Iminjunju isikhulu sidayisa iqembu
KUNGAKAPHOLI maseko iBlack Lions inyukele kwi-ABC Motsepe League, kuvela ukuthi isiyadayiswa ngenxa yokuswela inkence. UNkokhelo Zulu umnikazi nomqeqeshi weLions uthe insonsotha ngendlela eyisimanga inhliziyo yakhe uma ecabanga ukuthi leli qembu alichaza njengengxenye yempilo yakhe kumele alidayise.
Uveze ukuthi wonke amathemba akhe usewabeke kumasipala wangakubo eMandeni athi uthembise ngokumxhasa.
“Inhliziyo yami ibuhlungu ngendlela eyisimanga. Okungiphatha kabi kakhulu ukuthi sekuyacaca ukuthi liya kuphi njengoba lilwe laze langena kulesi sigaba. Ngihluleka nawukubuka abadlali bami nabobonke ababe nesandla empumelelweni yeLions. Wonke amathemba sengiwabeke kumasipala waseMandeni othe uzongixhasa. Ngiyazicelela nakosomabhizinisi baseMandeni nakulona lonke Ilembe ukuthi bafake isandla, nali igugu labo lizohamba,” kuzikhalela uZulu.
Emasontweni edlule leli qembu laseBhidla, elokishini laseSundumbili, eMandeni, linyukele kwiMotsepe neRunning Water yasesifundeni Umzinyathi kuma-SAB Play Offs abeseMnambithi.
NgoMgqibelo kuzomele liyibambe ishisa kowokuhlunga weNedbank Cup wamaqembu eMotsepe League. Lizodlala neQwabe United koqala u-11 ekuseni, KwaNgcedomhlophe Stadium.
Amaqembu akwiMotsepe alwela ukugcina engene kwiLast 32 Nedbank Cup.
UZulu uthe kayikho iyenzenjani, kuzomele bayibambe ishisa.
“Okungiphatha kabi wukuthi siya kulo mdlalo ngaphandle kwezethenjwa zethu ezintathu ezithathwe yizinhloli. Zithe ziyobazamela amaqembu ePSL, eGoli. Bengingeke ngime endleleni yezingane. Nakuba sixhuga, ngiyayixwayisa iQwabe ingalinge iseye,” kuqhuba uZulu othe iLions yasungulwa ngo-1968.
Phakathi kwamaqembu asedayisiwe ngaphambi kweyeNedbank, kukhona iGWP Friends ethengwe i-G Millionaire yaseMzimkhulu ebidlala kwiSAB League.
IFriends ibe seyithenga isitifiketi seNatal United.
EseReinham Sporting sithengwe iNjampela yaKwaNongoma nayo ebidlala kwiSAB, bese ese-Edendale Juventus sathathwa Umsinga United nawo obudlala kulesi sigaba esingaphansi kweMotsepe League.
Imidlalo yeNedbank Cup ezodlalwa ngoMgqibelo iqhathwe kanje: Emzimkhulu: Movers v XI Experience (9am); Wanderes v Millionaire (11am). Emzisho Stadium: Royal Eagles v Running (9am); UMsinga v UMvoti (11am). Umhlathuze Sports Complex: Njampela v Milford (9am); Milford v Ethekwini Coastal (12pm); EThekwini v Njampela (3pm). KwaMgcodomhlophe: Muzi King Masters v Durban FC (9am); Lions v Qwabe (11am). Chatsworth Stadium: KwaDabeka v Friends (9am); Summerfield v Real Kings (11am).