Ucabelwa indlela eya kweleChiefs
UPHENDLELWE indawo eqenjini leKaizer Chiefs elidlala kwiDStv Diski Challenge umfowabo kaReneilwe Letsholonyane, onomlando omuhle eNaturena.
IChiefs imemezele ukuthi uTshidiso Letsholonyane, obekade eqeqesha iqembu leChiefs lika-Under 17, uzohlala ebhentshini kweleDiski Challenge namaphini kaGavin Hunt eqenjini elikhulu, u-Arthur Zwane noDillon Sheppard.
Iqembu leDiski kwiChiefs kade liqeqeshwa nguZwane. Uwine nalo iMultichoice Diski Shield kumasizini amabili adlule.
UTsepiso wayengumdlali weChiefs eqenjini likaUnder 19 elaliqeqeshwa ngu-Ace Khuse. Bawine iligi yeSAB League ngesizini ka-2013/2014. Nokho ukulimala kumphoqe ukuthi aliyeke ibhola ngo2017, waqala izifundo zokuqeqesha.
“Ebhentshini leChiefs, emdlalweni wayo wokuvula weDStv Diski kuzohlala amaphini aseqenjini elikhulu u-Arthur Zwane noDillon Shappard. UZwane, oseqeqeshe leli qembu kusukela ngo-2016 uzolithola esekwa nguSheppard nomunye wabaqeqeshi basemaqenjini amancane, uTshidiso Letsholonyane, “kubhale iChiefs kwi-website yayo.
Isizini entsha yeDiski yethulwe ngokusemthethweni ekuqaleni kwesonto ngusihlalo wePremier Soccer League (PSL), u-Irvin Khoza.
IChiefs izovula neMamelodi Sundowns emdlalweni ozoba seGiant Stadium, eSoshanguve, ngeSonto ngo-1 emini.
Nakuba uTshidiso ezosebenza noZwane noSheppard, obeshaya ngeqembu elinzima kwiBidvest Wits ngesizini edlule, wuyena ozosala ebhentshini uma umdlalo weqembu likaHunt uqondaba noweleDiski.
IChiefs ngelinye lamaqembu ahlomule kakhulu ngeDiski Challenge ngenxa yabadlali abasuka kuyona asebenyuselwe esikimini esikhulu.
Kulaba badlali kukhona uNjabulo Blom, Nkosingiphile Ngcobo, Happy Mashiane nabanye. IBloemfontein Celtic, Lamontville Golden Arrows ngamanye amaqembu ahleka wodwa uma kukhulunywa ngeDiski Challenge ngenxa yezinga labadlali asebenyukele ezikimini ezidlala kwiDStv Premiership.