Isiphakamiso ngabafa ezingozini zomgwaqo
SEZIBAQEDILE izingozi zomgwaqo abadlali bebhola kuleli. Maningi amagama abadlali okusenzima ukwamukela ukuthi kabasekho emhlabeni ngenxa yezingozi zomgwaqo. Kukhona uLesley “Slow Poison” Manyathela, Gift “Vum Vum” Leremi, Sinethemba Jantjie. Muva nje abathandi bebhola emhlabeni basakhala bayazithulisa ngokudlula emhlabeni kuka-Anele Ngcongca. Abanye bagcina ngokukhubazeka ngazo belu izingozi zomgwaqo.
Ziningi izizathu ezishiwoyo eziholela ekutheni abadlali begcine bezithola belimala emgwaqweni. Iningi liyaye likhale ngophuzo oludakayo, nempilo yasebusuku. Leli phephandaba lilumane indlebe nenkakha edlalele iMoroka Swallows, uLefa Tsutsulupa ukuzwa owakhe umbono ngalolu daba.
UTsutsulupa ungomunye wabadlali owawungeke uzwe lutho lubhalwe ngaye olubi, wayengukaputeni kuleli qembu elibuye ngamandla kule sizini esigabeni esiphezulu.
Ngokusho kwale nkakha, iyodwa indlela yokunciphisa izingozi zomgwaqo kubadlali, abashona besebancane emigwaqweni yakuleli.
“Lolu daba lusondelene kakhulu nenhliziyo yami, ngoba baphelile abafowethu emigwaqweni. Mhlawumbe le nto angiyiqale la, unikezwa kanjani umdlali imoto engakaze ashayele nakanye empilweni yakhe? Benjalo nje bathenga nezimoto ezine-Turbo, okusho ukuthi yimoto egijimayo efuna umuntu osekujwayele nokushayela. Ngibona ukuthi mina abadayisa izimoto, amagaraji kanje, iwona angasitakula kule nkinga,” uqale washo kanje uTsutsulupa.
“Into okumele yenzeke lapha, ukuthi umdlali kufanele aqale aveze ubufakazi bokuthi useke washayela ngaphambilini.
“Uma engenabo, kungcono afundiswe, yize ezofika nalayisense yokushayele kodwa lapho ethenga khona imoto kufanele abe nekilasi okungenani lenyanga. Lapho uzobe efundiswa ngohlobo lwemoto azoyithenga, aphinde athole umuntu ozolokhu emjwayeza yona.
Uma kuphela isikhathi leso kubonakala ukuthi akaphasanga (umdlali), kumele anganikwa imoto aqhubeke afundiswe,” kusho uTsutsulupa.
Okunye okushiwoyo ukuthi abadlali bayazithenga izincwadi, ngoba sebejahe ukubukwa sebeshayela izimoto zikanokusho.
Leli phephandaba libuze uTsutsulupa ukuthi kungani abadlali abadlala eminye imidlalo efana nebhola lombhoxo, ikhilikithi nokunye bekwazi ukuziphatha, okuyimidlalo okwande kuyona ezinye izinhlanga kunabaldlai abamnyama abagcwele ebholeni.
“Baqala ukushayela besebancane kakhulu. Umuntu lo othi eyofunda esikoleni samabanga aphezulu usethengelwe nemoto yakhe, ngakho kakufani. Ngeshwa kubantu bakithi, uthola ukuthi umdlali uyena emndenini wakubo oqala nokuthenga imoto. Kodwa ulwazi yilona esishoda ngalo, sigagamela kakhulu,” ubeke kanje uTsutsulupa.