Wamukele inselelo eqenjini lethula unozinti omusha
UKAPUTENI waMaZulu FC uSiyabonga “Nqaba” Mbatha, uyakwamukela ukuthi uzoshisa phansi umbango wejezi phakathi kwakhe noVeli Mothwa othulwe yileli qembu njengomdlali omusha ngoLwesibili.
UMbatha utshele leli phephandaba ukuthi ukulungele ukulwela indawo yakhe kodwa wathi ekugcineni akukho ngaye, kumayelana neqembu okufanele lenze kahle.
Izikhulu zoSuthu eziholwa uSandile Zungu, sezikubeke kwacaca ukuthi aziyingeni indaba yokuthi leli qembu linikele ngamaphuzu, lilwele ukuvika izembe.
“Kuhleze kukuhle ukuthola umuntu ozokuphusha, akwenze ufune ukwenza okungaphezulu. Kuyinto enhle kakhulu ukufika kukaMothwa, ngiyathemba futhi sizosebenzisana kahle.
“Ekugcineni yiqembu elihamba phambili, hhayi isiqu somuntu. Uma ngokomqondo ngisesimeni esihle, ngeke lingilahlekele ijezi kodwa uma ngizodonsa ubuso ngilokhu ngizihudula, abaqeqeshi bazobona ukuthi angikho esimeni esihle, bese lingilahlekela ijezi.
“Lilonke nje ngichaza ukuthi ngiyayazi into okumele ngiyilindele, sengidlale isikhathi eside kakhulu kwiPremiership, ukuqonda izimo ezifana nalezi,” kusho uMbatha ngokuzethemba.
Lo nozinti owazakhela igama kwiThanda Royal Zulu, uphinde wacacisa ngokulimala kwakhe okuzomenza angabonakali ngempelasonto uma Usuthu selubhekene neTshakuma FC emdlalweni weDStv Premiership, eThohoyandou Stadium.
“Ngashayeka umbala sidlala neMamelodi Sundowns, odokotela baveza nokuthi ngithenteke nedolo kancane.
“Kodwa cha, akuyona into embi kangako, ngicelwe ngodokotela ukuthi ngime amasonto amabili, kodwa ngiyaziqeqesha neqembu,” kucacisa uMbatha.
Esikhathini esidlule, uMbatha ugxekiwe ngesisindo somzimba wakhe okungenzeka ukuba simshwebise nangendawo kwiBafana Bafana ngaphansi kukaStuart Baxter.
UMbatha uthe yena uyasamukela isisindo sakhe, nathe yize egxekwa kunjalo kodwa izibalo zokuvimba kwakhe zehlula onozinti “abanesisindo esihle”.
“Ngiyakwamukela ukugxekwa ngokwakha, kodwa hhayi ukugxekwa ngoba nakhu umuntu ebukisa ngami. Ngiyawazi umzimba wami, futhi ngivimba kunjalo ngenze kahle.
“Nokho ngizibophezele ekuqasheni umuntu oqonda indlela yokudla, ukuzivocavoca nokunye okuthinta isisindo somzimba.
“Lokhu ngikwenza ngayedwana ngemali yami, ngoba ngenzela ukuthi ngehlise kancane emzimbeni. Yize ngikwenza lokhu, bengingaphazamiseki nakancane mina ngomzimba wami,” kusho uMbatha.