Usebeke ithemba kuMazinyo oweMaritzburg
USIHLALO weMaritzburg United, uFarook Kadodia, uthi akakungabazi ukuthi ukufika kuka-Ernst “Mazinyo” Middendorp kwezakhe kuzoletha uzinzo, baqale ukukoleka amaphuzu.
ITeam Of Choice ibambe ibhuleki kwi-log yeDStv Premiership njengoba ingakatholi nelilodwa iphuzu emidlalweni emihlanu.
Lokhu kuphoqe ukuthi leli qembu likhombe indlela u-Eric Tinkler, obebukeka sengathi uyoba yidlozi kuleli qembu kodwa kwaphika inhlahla, kugqoza imiphumela.
UKadodia ubuyise uMiddendorp, omanambanambana kubalandeli beKaizer Chiefs, ashweba nayo isicoco seligi ngomdlalo wokugcina ngesizini edlule.
“Kangingabazi nakancane ukuthi sithathe isinqumo esihle ngokubuyisa uMiddendorp. Ngiyakholelwa ekutheni sidinga ukunqoba nje imidlalo embalwa, isimo sibuyele kwesijwayelekile,” kusho uKadodia.
Lesi sikhulu sikuqinisekisile ukuthi uMazinyo uzobe ekhona ebhentshini leMaritzburg ngempelasonto, uma isibhekene neMamelodi Sundowns emdlalweni weDStv Premiership.
Leli phephandaba lihoshe ngemithombo yalo ukuthi lo mqeqeshi odabuka eGermany, ubezoba sebhentshini ngeledlule iqembu lakhe lidlala neSuperSport United, kwavimba ukuthi imoto eyayizomletha enkundleni yabambezeleka.
“Kakubuzwa ukuthi abaqeqeshi behlulelwa ngokunqoba imidlalo. Silindele okufanayo nakuMiddendorp.
“Kuyajabulisa nokho ukuthi abadlali abaningi bayamazi eqenjini lethu. Abanye bakhuliswe nguyena.
“Ngiyazi abanye bazozibuza ukuthi yini eyenza wahamba kwasekuqaleni uMiddendorp kithina.
Ngaleso sikhathi yingoba wakubeka kwacaca ukuthi usafuna ukuzikhulisa, sase simkhulula-ke,” kucacisa uKadodia.
UMiddendorp usayine inkontileka yeminyaka emithathu neTeam Of Choice.
Namuhla kulindeleke ukuthi uDelron Buckley axoxe nezintatheli mayelana namalungiselelo ezakhe ngaphambi komdlalo omkhulu neSundowns ngoMgqibelo, eHarry Gwala Stadium, ngo8.15 ebusuku.
Ziya kulo mdlalo nje amaBrazilians ashaya kwasani futhi avuthelana ngamagoli amathathu kuya phezulu.
Imidlalo yeDStv Premiership:
NgoMgqibelo - Ngo3.30pn: Cape Town City v Orlando Pirates (Cape Town Stadium); Golden Arrows v Swallows (Sugar Ray Xulu Stadium).
Ngo-6pm: Tshakhuma FC v AmaZulu FC (Thohoyandou Stadium).
Ngo-8.15pm: Maritzburg United v Mamelodi Sundowns (Harry Gwala Stadium).
NgeSonto - Ngo-3.30pm: TS Galaxy v Stellembosch (Mbombela Stadium); Baroka v Chippa United (Peter Mokaba Stadium).