Yinkantolo ezoxazulula udaba lokuphinda ukubhalwa kwezifundo
UMNYANGO weMfundo eyisiSekelo uthi ukulungele ukuvikela isinqumo sawo enkantolo sokuthi kubhalwe kabusha amaphepha ka-matric aputshukile.
UMnuz Elijah Mhlanga obhekele ezokuxhumana kulo mnyango usho kanje ngemva kokuthi iSouth African Democratic Teachers Union (Sadtu), ithe iya enkantolo namhlanje ukubopha umnyango nohlaka olubhekele izingabunjalo lika-matric, Umalusi.
“UMnyango weMfundo eyisiSekelo unqume ukuthi abhalwe kabusha amaphepha eMathematics Paper 2 nePhysical Science Paper 2, aputshukile ukuvikela isithunzi sezivivinyo.
“Iphepha lesibili leMathematics lizobhalwa ngoDisemba 15 bese elesibili lePhysical Science libhalwe ngoDisemba 17. Besazi ukuthi kunabazosiyisa enkantolo kodwa besiphoqelekile ukuthatha lesi sinqumo. Abameli bethu bakulungele ukuyosivikela enkantolo,” kusho uMhlanga.
Uthe okwamanje akwaziwa ukuthi ngubani oputshuze amaphepha kwazise uphenyo lusaqhubeka.
Ubalule ukuthi abakwazi ukubhalisa abafundi bendawo eyodwa amaphepha aputshukile ngoba akwaziwa ukuthi bangaki abafundi abagcine bewabonile amaphepha ngakho ukuvikela isithunzi sezivivinyo zika-matric, kuzobhala bonke abafundi.
UNobhala Jikelele weSadtu, uMnuz Mugwena Maluleke, uthe namhlanje baya enkantolo ngoba ucwaningo luveza ukuthi bawu-200 kuphela abafundi ababone amaphepha kubafundi abawu-390 000, akade bebhala izifundo ezithintekayo.
Uthe banethemba lokuthi inkantolo izokwazi ukululalela kahle lolu daba ngoLwesibili ukuze kusheshe kutholakale isixazululo.
“Isinqumo sokuthi kubhalwe kabusha amaphepha aputshukile sishiye abafundi nothisha bekhathazekile ngoba bekunzima ukulungiselela izivivinyo zika-matric kulo nyaka.
“Kungani kujeziswa abafundi ngento engesilo iphutha labo?” kubuza uMaluleke.
Uthe lesi simo sifakela abafundi ukhwantalala.
Inhlangano yabafundi iCongress of South African Students (Cosas), ithe izoya enkantolo ngoba umnyango kufanele ujezise inkampani eshicilela amaphepha ezivivinyo, hhayi abafundi.
Okhulumela iCosas kuzwelonke uDouglas Ngobeni, uyalele abafundi ukuthi badube lawa maphepha, bangawabhali ngoba akumele zife ngamvunye.
UMengameli weNational Teachers’ Union (Natu), uMnuz Allen Thompson, uthe sibalulekile isithunzi sezivivinyo zika-matric ngoba ziningi izinqumo ezenziwayo ngokubuka lezi zivivinyo.
“Uma kukhona ungabazane ngezivivinyo zika-matric kusho ukuthi nezitifiketi zizobukwa ngelinye iso, ngeke zisawavula amathuba ahlukene empilweni yomfundi. Isinqumo sokuthi kubhalwe kabusha amaphepha aputshukile asisithusi.
“Akwaziwa ukuthi bangaki ababone amaphepha aputshukile ngakho ukubhala kabusha izivivinyo ezithintelayo yisona isixazululo.”
Imizamo yokuthi Umalusi uphawule ngalolu daba ayiphumelela njengoba owukhulumelayo, uMnuz Lucky Ditaunyane, engayiphendulanga imibuzo athunyelelwe yona nge-email, nge-sms nashiyelwe yona kwi-voice mail.