Bahlaba ukuphindwa kwamaphepha
KUYASILIMAZA isimo somqondo sabafundi ukuphinda iphepha abese bezitshela ukuthi sebelibhalile, okungaba nomphumela ongemuhle uma sekumenyezelwe imiphumela.
Lokhu kushiwo ngabeluleki bezengqondo kulandela isimemezelo sikaNgqongqoshe weMfundo eyisiSekelo uNkk Angie Motshekga, sokuthi amaphepha aputshukile azophinde abhalwe ngesonto elizayo.
UMnuz Ndabe Myeza ongumeluleki wezengqondo, uthe lokhu kungahle kwenze imiphumela yabafundi ingabi mihle.
“Abafundi bese bezitshela ukuthi sebeyaqeda ukubhala, abanye sebehlisile kancane emfuthweni abebenawo ngesikhathi beqala. Abanye bese beqalile ukuzijabulisa ngezinto ezehlukene, ngakho ukubabuyisela esimeni sokubhala izifundo ezidinga kakhulu umqondo, kungaba nemiphumela engemihle ekuphasweni kwazo,” kusho uMyeza.
UNkk Hameeda Bassa-Suleman naye ongumeluleki wezengqondo, uthe ukubhala lawa maphepha okwesibili kuzobafakela ingcindezi nokhwantalala abafundi.
“Bazoba bancane kakhulu abafundi abazokwazi ukwenza kangcono uma sekubhalwa izifundo. Iningi labafundi lizothwala kanzima kakhulu ngenxa yalesi sinqumo sokuthi kuphinde kubhalwe amaphepha, bona abese bezitshele ukuthi baqedile ngawo,” kusho uNkk Bassa-Suleman.
USihlalo wenhlangano elawula izigungu zezikole KwaZulu-Natal uMnuz Zwile Zulu, uthe udaba lokuphindwa kwamaphepha kumele lubukwe nxa zonke ukuze kuqhanyukwe nesisombululo esizovuna wonke umuntu.
“Kuyiqiniso ukuthi abafundi kuzobafaka ngaphansi kwenkulu ingcindezi ukubhalwa kwamaphepha okwesibili ngoba bese bezitshelile ukuthi badlulile kuwo. Ngakolunye uhlangothi ukungaphindwa kwawo kungenza umfundi obewabhala, angabinakho ukuziqhenya okuphelele ngesitifiketi sakhe impilo yakhe yonke ngenxa yokuthi angahlale esoleka ngokuthi kungenzeka ukuthi wabhala eselibonile iphepha, okungenza noma eziphase kahle lezi izifundo angakutholi ukuhlonishwa okumfanele. Ukuphindwa kwawo kungabenza bazethembe abafundi,” kusho uZulu.
Uthe akuzona izinhlaka ezithile kuphela okumele zibe nombono kulolu daba kodwa kumele abantu bakuleli baveze imizwa yabo okungalekelela esinqumeni esiyisona.