Bazohlala ebumnyameni eMsunduzi
UZOBA mnyama uKhisimusi kwizakhamuzi zaseMsunduzi njengoba izingxenye eziningi zalo masipala zizonqanyulelwa ugesi.
Nakuba inkampani ephakela ngogesi i-Eskom isalumisile uhlelo lokunqamula ugesi, izakhamuzi zakulo masipala zizonqanyulelwa ugesi.
Lokhu kwenzelwa ukwehlisa ukusindwa kwingqalasizinda ehlulekayo ukumelana nomthamo.
Kula masonto adlule, izakhamuzi zasezindaweni ezahlukene ezakhele lo masipala bezibhekene nenkinga yokuhamba kukagesi.
Manje umasipala usukhiphe uhlu lokunqanyulwa kukagesi njengoba iqhubeka inkinga yokuhamba kwawo ezingxenyeni eziningi ezakhele umasipala.
Esitatimendeni imeya yalo masipala uMnuz Mzimkhulu Thebolla, ithe zisekude ukuphela izinkinga zikagesi ezikhungethe izingxenye ezehlukene kumasipala.
“Izinkinga zokuhamba kukagesi ezindaweni eziningi zidalwa yizizathu ezahlukene, okubalwa isimo sezulu esingesihle, ingqalasizinda endala futhi ethwele umthamo omkhulu kunalowo okufanele iwuthwale, ukuntshontshwa nokucekelwa phansi kwengqalasizinda. Ukuxhunywa kukagesi ngokungemthetho, ukushoda kwemali yokulungisa ingqalasizinda nokushoda kwabasebenzi ngezinye zezizathu zokuthi ugesi ucinywe. Sisafake isicelo kumgcinimafa kazwelonke nasebhange iDevelopment Bank of SA ukuze sithole imali yokushintsha ingqalasizinda endala.”
UThebolla uthe bayazama ukulungisa inkinga kodwa wathi bayaphoqeleka ukuthi okwamanje kucinywe ugesi ukuze kuncishiswe ukusindwa kwengqalasizinda.
“Lena yinkinga engeke isheshe ixazululeke. Yingakho sesiqhamuke nohlelo lokucinywa kukagesi. Sithanda ukunxusa izakhamuzi ukuthi zikhokhele izidingo zikamasipala ukuze ube nemali yokulungisa ingqalasizinda. Sithanda ukunxusa izakhamuzi ukuthi ziyeke ukuxhuma ugesi ngokungemthetho, ziyeke ukweba nokucekela amakhebuli.”
Ugesi uzocinywa eNorthdale, enkabeni yedolobha, eHilton, Sweetwaters, Blackridge, Westgate, Foxhill, Mpumelelo, Claridge, Woodlands, Sobantu, Tamboville, Thembalihle, Scottville, Town Bush naseChase Valley.