Basola uMasipala weTheku abadayisayo
BAKHALA ngokuxhashazwa wuMasipala weTheku obafuna izimvume zokudayisa, abadayisi basemgwaqweni enkabeni yedolobha.
Amaphoyisa kamasipala abe nomkhankaso wokukukhuculula izolo kanti abadayisi iningi labo elidayisa eWorkshop nasemakethe, bawasola ngokuchema nabokufika. Bathi ukususwa kwabadayisa emgwaqweni bekungakaze kwenzeke phambilini kodwa kwenzeka manje ngoba sebethathe isinqumo sokuxosha abokufika abasebenza kulezi zindawo ngokungemthetho kodwa umasipala ubungabanakile.
UMnuz Themba Mkhize odayisa emgwaqweni, uthe umasipala ubaphuca isinkwa abaphilisa ngaso imindeni yabo.
“Kungani ukufunwa kwezimvume kwenziwa manje ekubeni ngesikhathi kusagcwele abokufika kulezi zindawo bezingakaze zifunwe? Umasipala uchema nabokufika. Izimvume abakhala ngazo sisezinhlelweni zokuzithola. Uhlu lwamagama abadayisi abakhona sesiluhambisile kodwa asikwazi ukuhlala singadayisi silinde izimvume ekubeni kuyisikhathi lapho imali idingeka kakhulu,” kusho uMkhize.
Uthe basebenzisana nomakadebona boMkhonto weSizwe iMKMVA, ukususa abokufika abadayisa ngokungemthetho ngoba kabagcini ngokudayisa ngokungemthetho kodwa baphinde babasole ngokudayisa nezidakamizwa.
Okhulumela amaphoyisa kuMasipala weTheku uSuperintendent Parboo Sewpersad, uthe lona wumkhankaso wamaphoyisa wokukhuculula ukulungiselela amaholidi kaKhisimusi.
“Akusikhona ukuthi sibheka abadayisi abangenazimvume kuphela kodwa sibheka konke okungalungile okwenzeka edolobheni kubalwa nokuphuza esidlangalaleni, ukungcolisa idolobha nobugebengu obehlukene,” kusho uSewpersad.
Uthe ngeke bubekezelelwe ubugebengu edolobheni, ngakho kuzoqhanyukwa nazo zonke izindlela ukuqinisekisa ukuthi abaphula umthetho bayaboshwa.