Kulindeleke ukuba lihlehle elikaZuma
ICALA lowayengumengameli wezwe uMnuz Jacob Zuma obekulindeleke ukuba libe senkantolo kusasa, kulindeleke ukuba lihlehliswe.
Lokhu kungasho ukuthi uFebhuwari 2021, owabekwa wuMbuso ukuba liqale ukuqulwa ngawo lokho ngeke kusenzeka.
Umthombo osondelene necala utshele i-Independent Media eshicilela Isolezwe izolo, ukuthi iNational Prosecuting Authority (NPA), abameli bakaZuma nabeThales, bavumelene ngokuthi icala lihlehliselwe olunye usuku.
Yize kunjalo leso sinqumo besingakaphasiswa yijaji ukuze sibe semthethweni.
Ukuhlehliswa kwecala kumayelana nokuthi iThales esolwa noZuma, ilindele isinqumo odabeni eyalufaka kwiNPA.
“Ngokuvumelana zonke izinhlaka, emva komhlangano zivume ukuba icala lihlehliselwe olunye usuku. Lokhu kusho ukuthi uZuma ngeke abe senkantolo ngoLwesibili njengoba kulindelekelile,” kusho umthombo.
Ummeli ka-Zuma u-Advocate Eric Mabuza, akazange aphawule ngalokhu.
Okhulumela iNPA uBulelwa Makeke, uvumile ukuthi kukhona isivumelwano abasenzile kodwa wangasiveza.
“Sisalinde ukuba kusayine ijaji, okwamanje kusengenzeka noma yini,” kusho uMakeke.
Sekungokwesibili lihlehliswa icala, lahlehliswa ngoSepthemba.
UZuma usolwa ngokugwazisa ngo-1998 kuya ku-1999 ngesikhathi kuthengwa izikhali.
UZuma uyawaphika amacala uthi anenhlese yepolitiki.
UMbuso uveze ukuthi unofakazi abangu-210 kuleli cala.
Umqondisi weNPA KwaZulu-Natal u-Advocate Elaine Zungu, utshele i-Independent Media ukuthi bayitshelile inkantolo ngofakazi.
”Kunofakazi abacela ku-210,” kusho uZungu.
Yize bengazange badalulwe kodwa oyedwa ovelile ngungqongqoshe obhekele imisebenzi kaHulumeni neNgqalasizinda uNkk Patricia de Lille. Yize kunjalo uNkk De Lille watshela i-Independent Media ngoSepthemba ukuthi iNPA ayikaze ithathe isitatimende sakhe.
Wathi ulindele bamthinte futhi uzimisele ukubanikeza ulwazi analo.