Akayizwa eyokunikwa ikhefu engalicelile
IPHAKIWE impi phakathi komholi weDA, uMnuz John Steenhuisen, nowehlisiwe esikhundleni, uNkk Phumzile van Damme, onikezwe ikhefu engalicelanga.
USteenhuisen uthe bamnikeze ikhefu ngoba isimo sempilo yakhe singesihle. Ukwenze lokhu ngesikhathi enza izinguquko ethimbeni azosebenza nalo ePhalamende.
Isikhundla sikaNkk Van Damme sokuba yilungu lePhalamende sithathwe nguMnuz Zakhele Mbhele.
USteenhuisen, obezokhankasa eThekwini ngoMgqibelo, usivikele isinqumo sakhe sokukhomba indlela uNkk Van Damme.
Uthe ubemcabangela ngoba isimo sakhe sempilo sibuye singabi sihle.
“Kuyaziwa ukuthi ubengaphilile kahle, ngakho leli khefu esimnikeza lona ngelokuphumula. Kuyamangaza futhi kuyishwa ukuthi yena le nto uyithathe kabi. Njengomholi ngisuke ngifuna ithimba lami libe namandla anele okukwazi ukusebenza. Ngicabange ukuthi kuzoba wumqondo omuhle ukumnikeza ikhefu,” kusho uSteenhuisen.
Uthe iPhalamende liyoze libe nemihlangano ngonyaka ozayo.
Wengeze ngokuthi uma uNkk Van Damme engafisi ukuthatha ikhefu akuyona inkinga, yilungelo lakhe kodwa yena njengomholi wenze isinqumo abebona sifanele.
“Uma engahambisani nalesi sinqumo ayikho inkinga kodwa ngeke ngilindele ukuba asebenze phambili ethimbeni lami,” kusho uSteenhuisen.
UNkk Van Damme ubhale kuTwitter ngoLwesihlanu ukuthi uSteenhuisen umazisile ngesinqumo sokuba athathe ikhefu, yize yena engazange acele ikhefu.
Uthe uyakulawula ukugula kwakhe futhi umsebenzi wakhe ubewenza kahle.
Yize kunjalo iDA izolo ithe ikhefu limfanele futhi benzela yena.
UNkk Van Damme uthe ikhefu lakhe alinikezwe yiqembu liyoze liphele ngoMashi 30, abameli bakhe ngo-2021 bazoxoxa neqembu ngalokhu.
NoNkk Nomsa Marchesi ususiwe ekukhulumeleni iDA kwezemfundo ePhalamende kwafakwa uMnuz Bax Nodada.