Beluleka uhulumeni ngemishanguzo yeCovid-19
ISOUTH Africa Medical Association (Sama) icele uMnyango wezeMpilo kuleli ukuthi usebenzisane namanye amazwe ukuthenga ikhambi leCovid-19.
Esitatimendeni esithunyelelwe kwabezindaba iSama, ithe kuyaphoxa ukuthi uMnyango wezeMpilo kuzwelonke awuyikhokhanga imali yokubekisa ukuthenga ikhambi leCovid-19 namanye amazwe.
“Kufanele ukuthi uMnyango wezeMpilo kuzwelonke uqinisekise ukuthi likhona ikhambi leCovid-19, ikakhulu ngaphambi kokuthi isigaba sesibili salolu bhubhane sidlange kakhulu. Sikholwa wukuthi uMnyango wezeMpilo ungenza kangcono ngokuxoxisana nezinkampani ezikhiqiza amakhambi ukuze imishanguzo itholakale kalula, nangemali engambi eqolo,” kusho uDkt Angelique Coetzee osebhodini leSama. Uthe amanye azwe aseqalile ukufaka imali ukuze athole imishanguzo ngemali engambi eqolo.
“UMnyango wezeMpilo nohulumeni waseNingizimu Afrika kufanele uthenge ikhambi leCovid-19 namanye amazwe. Kufanele abantu bakhumbule ukuthi ngaphansi kwesivumelwano seCovax, iNingizimu Afrika ibukwa njengezwe elinemali. Izokhokhiswa imali efanayo nemali ekhokhwa yi-United States of America. Akufanele uhulumeni avume lokhu ngoba umnotho awenzi kahle. Kufanele asayine isivumelwano esizonika iNingizimu Afrika ikhambi ngemali encane ezokhokhwa ngamanye amazwe ase-Afrika angenzi kahle kwezomnotho,” kusho uDkt Coetzee.
Uthe iSama iluleka uhulumeni ukuthi axoxe nezinkampani ezikhiqiza imithi namaphilisi ukuze akwazi ukuthola ikhambi leCovid-19 ngemali encane.
UDkt Coetzee ukhale ngokuthi amakhambi eCovid-19 akhona njengamanje kawabhalisiwe eNingizimu Afrika kanti kufanele abhaliswe nakuleli ukuze abantu bakwazi ukuwathola kalula.
Uphethe ngokuthi uMnyango wezeMpilo kuzwelonke kufanele ubeke zonke izinhlelo zawo obala ukuze kuzovikelwa abasebenzi bezeMpilo nabantu bakuleli kwiCovid-19.
UMnyango wezeMpilo uthe uzokhokha uR327,118 ohlelweni lokuthola ikhambi leCovid-19.
Le mali izokhokhwa ngoDisemba 15 futhi iNingizimu Afrika iseyingxenye yohlelo lweCovax oluqinisekisa ukuthi ikhambi litholwa yiwo wonke amazwe.