Omame bayibambe ngazo zombili emashini
KUCISHE kwaphela umcimbi amaphoyisa nonogada begasela emashini yenhlangano yabesifazane, yokuhambisa izikhalazo ngokujivazwa kwamalungelo abesifazane ebhange iThala ePoint Waterfront, eThekwini ngoLwesihlanu.
Amaphoyisa nonogada abesho ukuyiqeda imashi yeWomen of South Africa (Wosa), ekhala ngomsindo.
Batshele abebehambele imashi ukuthi awuvumelekile umsindo endaweni abebemashela kuyo. Kuphoqeleke ukuthi abebeyihambele bavale umbhobho abebewusebenzisa basondele eduze kweminyango yeThala ukuze bekwazi ukuqhubeka nezinhlelo zokushiya uhlu lwezikhalazo ebezibhekiswe kuleli bhange.
Phakathi kwabangagculiseki ngakho abakubalule kulolu luhlu, wukungathuthukiswa kwabesifazane ngendlela efanele kwezomnotho, ababale ukunganeliseki ngesibalo sabathola ukuqeqeshwa ngezamabhizinisi kuhulumeni nasezinkampanini ezizimele. Bakhale nangokungaxhaswa ngendlela egculisayo kwabesifazane abanamabhizinisi.
IWosa iphinde yaveza ukukhathazeka kwayo ngezigwebo zamacala athinta ukuhlukumezeka kwabesifazane. Ithe ifuna uhulumeni abhekisise kahle ukuchitshiyelwa komthetho mayelana namacala okudlwengula, ukubulawa nokushaywa kwabesifazane.
UNobhala we-ANCWL eKZN uNkk Nonhlanhla Gabela obehola imashi, uthe ibihlelwe kuzo zonke izifundazwe ngenhloso yokulwa nengcindezi ababhekene nayo abesifazane.
“Ngale mashi sihlele ukuthi kwehle udlame olubhekiswe kubantu besifazane ngezindlela ezahlukene. Uma sibheka asikafiki lapho okumele sibe khona. Yingakho njengenhlangano iWomen of South Africa ngokubambisana ne-ANCWL, sihlele ukuthi sihambele izindawo ezisebenza ngezomnotho ngenhloso yokuthi sizwakalise ukungagculiseki kwethu ngokubhekelelwa kwabesifazane kwezomnotho. Sikholwa wukuthi lizokwehla udlame olubhekiswe kubo uma bengase bakhuliswe ngokomnotho, ngoba iningi labo lihlezi ebudlelwaneni obungalungile ngoba lingenawo amandla okuziphilisa,” kusho uNkk Gabela.
Phakathi kwezinhlangano ezahlukene ezilwa nokuhlukunyezwa kwabesifazane ebeziyingxenye yemashi, kubalwa iSex Workers Education and Advocacy Tasks (Sweat) elwela amalungelo abadayisa ngomzimba, Ithembalethu 34 Community Development elwela amalungelo abesifazane nabezinhlangano ezilwela amalungelo abathandana nobulili obufanayo.
UNksz Nomusa Jali weSweat, uthe inhlangano yabo ijoyine imashi ngenhloso yokuzwakalisa ukukhathazeka kwayo ngabantu besifazane okujivazwa isithunzi sabo ngoba benza umsebenzi wokudayisa ngomzimba.
UNksz Sibongile Gcwensa weThembalethu 34 Community Development, uthe inhloso yenhlangano yabo ngokujoyina le mashi, ngukuzwakalisa ilaka labo ngokuhlukunyezwa kwabesifazane ababulawa nsuku zonke kuleli.
UNkk Sithandiwe Dimba weThala, uthe uhlu abebelethelwe lona bayalwamukela. “Sizoqinisekisa ukuthi siyalekelela lapho singakwazi ukusiza khona ekuthuthukisweni kwabesifazane kwezomnotho.”