Ukungabhali kabusha kungenza izinga lokuphasa lingabazeke
SAMUKELWE ngezindlela ezehlukene isinqumo soMnyango weMfundo eyisiSekelo sokuthi abhalwe kabusha amaphepha aputshuke ngaphambi kokuthi abhalwe – elePhysical Science nephepha lesibili leMaths.
Ukuputshuka kwamaphepha kubeke umnyango endaweni ongakaze ube kuyo emlandweni wokubhalwa kwezivivinyo zika-matric eNingizimu Afrika.
Yingakho nesinqumo osithathile sivungamise izwe nezinhlaka ezithintekayo zehluka ngemibono.
Ngokusho komnyango sibalelwa ku-200 isibalo sabafundi okusolakala ukuthi babona amaphepha aputshukile. Bebonke abafundi ababhale lawa maphepha bawu-390 000.
Abaphikisana nesinqumo somnyango bathi akumele isibalo sabafundi okuhlawumbiselwa ukuthi bawu-200 sithinte bonke abafundi balezi zifundo.
Uma uyibheka ngokwezinombolo yebo singakuvumela lokhu ukuthi mhlawumbe izifundo zibhalwe kabusha kuphela ezifundeni ezinabafundi okusolwa ukuthi bayathinteka.
Kepha esikhathini esiphila kuso esidlisa ngobuchwepheshe nokushesha kwezinkundla zokuxhumana, kungaba nzima ukuqinisekisa ukuthi iphepha libonwe ngabafundi abawu-200 kuphela.
Esikhathini samanje ulwazi udinga ukuluthumela kumuntu oyedwa kuphela ukuze lusabalale, kangakanani-ke uma sekuthiwa bawu200 abasolwayo?
Siyakuqonda ukuthi amaphepha aputshukile anzima futhi ukuzilungiselela ukuyowabhala nakho kusho ukuthi umfundi kumele abe sesimeni esifanele esingadingi ubuhlakani kuphela kepha esidinga nokuthi umzimba, umqondo nomoya nawo kube kukulungele ukuyobhala lezi zifundo ezithathwa njengezinamandla okuvula iminyango eminingi.
Yingakho sibazwela abafundi okuzomele babhale kabusha uma isinqumo somnyango sigcina siphumelela.
Kepha akumele kushaywe indiva ukuthi ukungabhalwa kwawo kuyobe kusho ukuthi aliqinisekisiwe izinga lokuphaswa kwawo ngoba akekho ongakwazi ukuphenya athole imiphumela engungqo yokuthi bangaki ngempela abafundi ababone amaphepha aputshukile.