Ukhozi alucacise ngoSgiya Ngengoma noTshatha
MHLELI: Ngiyakhuleka kinina beSilo, nina beNkayishana kaMenzi.
Cha lapha ngithi angike ngibhale ngibonge uhlelo loKhozi FM iSgiya Ngengoma lwangoDisemba 5 lapho uZimdollar Biyela ebelubambe yedwa khona kwaze kwamnandi.
Phela uma kukhona uzakwabo uKhathide “Tshatha” Ngobe sisuke sivelelwe ngabalandeli baKhuzani Mpungose ezinkundleni zokuxhumana bechoma ngaye. Angithi sonke sesiyazi ukuthi uTshatha uhamba naye uKhuzani, usesakaza kulolu hlelo ngokomyalelo kaKhuzani.
Kade engekho emoyeni, uZimdollar eyedwa kuSgiya Ngengoma nathi sazizwa samukelekile. Ave kumnandi ukulalela uhlelo olusakazwa ngumsakazi ongekho ezimpini zabaculi. Into engifike ngayifisa kade ngilalele uZimdllar wukuthi atholelwe umsakazi omusha wesilisa ongekho ezimpini zabaculi azosakaza naye uSgiya Ngengoma noma alandwe eziteshini ezincane noma afakwe noBheka Mchunu.
Kungaba mnandi kakhulu ngoba siyabazi ukuthi kabathathi hlangothi kubaculi bakamaskandi. Indaba kaTshatha ayisekho kuSgiya Ngengoma, ucheme noKhuzani. Usehlulekile wukukufihla lokho.
Nanempakamo asenayo usedelela ngisho abalandeli emoyeni.
Omunye umlandeli kaKhuzani uke wabhala ezinkundleni zokuxhumana ukuthi uTshatha akayi ndawo kuSgiya Ngengoma ngoba uxhumene kakhulu nompathi woKhozi FM, akulula ukuthi noma esephuma endleleni bamsole ngoba bayezwana kakhulu.
Engifisa udadewethu ophethe Ukhozi FM, uSbongi Ngcobo, akukhumbule wukuthi umlaleli nguyena obaluleke kakhulu kunomsakazi. Uma ezwakalisa isikhalo sakhe kuhle umsakazi asidlulisele kwabakhulu, hhayi ukuthi umsakazi abhinqe umlaleli emoyeni njengale nto eyenziwa wuTshatha. Uma lolu hlelo selunikezelwe kubalandeli baKhuzani noTshatha, Ukhozi aluphumele obala lusicacisele.
Sizwe Ndlovu KWASJULA