UKomphela ululeka uZwane ngokubaluleka kweqembu
USTEVE “Mphathi” Komphela, omunye wabaqeqeshi beMamelodi Sundowns, ululeke isibabuli somdlali weqembu, uThemba “Mshishi” Zwane, ukuthi akhumbule ukuthi udinga ozakwabo ukuze ashaye amagoli.
UZwane useshaye amagoli ayisithupha kwiDStv Premiership selokhu kuqale isizini.
UZwane ube yiPlayer Of The Season kwiPremiership ngesizini edlule ngenxa yobuhlakani bakhe okuhlanganisa ukwakha nokushaya amagoli abalulekile. Ifomu yakhe ilokhu iqhubeke njalo, nokumenza abe yisilomo zibekwa ekunqobeni umklomelo womshayi magoli ovelele uma kuphela isizini. Ngempelasonto ushaye igoli iSundowns idlala ngokulingana ngo 1-1 neMaritzburg United, eHarry Gwala Stadium.
Yize enconywa ngapha nangapha uZwane, ngokunqobisa amaBrazilians, uKomphela uthe okubalulekile okumele akukhumbule wukuthi udinga ozakwabo ukuze eshaye amagoli.
“Okubalulekile uZwane okufanele akuqonde wukuthi udinga ozakwabo ukuze ashaye amagoli. Ngamanye amazwi iqembu yilona elihamba phambili, hhayi umuntu ngamunye. Simfisela konke okuhle nokuthi anqobe umklomelo womshayi magoli ovelele kodwa okubalulekile yiqembu phambili,” kusho uKomphela.
IMaritzburg ibe yiqembu lesibili ukubamba iSundowns selokhu kuqale isizini. Elinye iqembu elenze lokhu iTshakuma Tsha Madzivhandila (TTM). Ngaphandle kwala maqembu omabili, Abafana Ba Style bebezidlela amahlanga, begudlula kwasani oluphambi kwabo, nokufakazelwa ukuqhwakela kwabo esicongweni se-log yeDStv Premiership.
UKomphela uthe bekumele bawathole wonke amaphuzu eMgungundlovu kodwa ukulahla kwabo amathuba kubenzele phansi kakhulu.
“UPeter (Shalulile) bekumele okungenani ashaye amagoli amabili kulo mdlalo. Ukudlala kwethu ngokulingana kusho ukuthi silahle amaphuzu amabili. Kodwa asiyincome nayo iMaritzburg idlale kahle kakhulu, ikakhulukazi njengoba inomqeqeshi osanda kuthatha izintambo u-Ernst (Middendorp). Phela abaqeqeshi basuke beqashelwa lokhu, ukuthi bashintshe izinto emaqenjini.
“Angiboni ukuthi izohlala isikhathi eside iMaritzburg kule ndawo ekuyo. Abalona neze iqembu elibi. Kuyenzeka kunoma yiliphi iqembu ukuthi imiphumela igqoze, akuyona neze into entsha,” kusho uKomphela.