Azikadingeki izihlwele ezinkundleni
ABAKHOHLWE labo abazitshela ukuthi iNingizimu Afrika izolandela amazwe ase-Europe, ivumele idlanzana lezihlwele ezinkundleni.
Obambe njengesikhulu esiphezulu kwiPremier Soccer League (PSL), uMato Madlala utshele Isolezwe ukuthi kabakaze bayibhunge nakancane noMnyango wezeMidlalo eyokuthi kumele kube nedlanzana labalandeli elivunyelwa ezinkundleni njengoba kwenzeka kwamanye amaligi emhlabeni. Ngempelasonto edlule e-England kuvunyelwe amaqembu azinze eLondon kwi-English Premiership, ukuba amukele abalandeli abawu-2000 enkundleni. Lokhu bakwenze ngoba kubikwa ukuthi sekudambile ukutheleleka ngeCoronavirus kule ndawo.
UMadlala uthe ukuphoqa lokhu akunasidingo njengoba lapha eNingizimu Afrika kubikwa ukuthi kungase kubuye ngamandla ukutheleleka ngeCoronavirus.
“Akusizi ukulandela amanye amazwe sibe sibona isimo sethu sihlukile. Amanye amazwe mhlawumbe kunezinhlelo azenzile. Akekho ongaboni ukuthi igagasi lesibili lifuna ukubuya ngamandla, sonke siyezwa ezindabeni. SiyiPSL akukho esingakwenza, konke sikuzwa ngoMnyango wezeMidlalo,” kusho uMadlala.
Emasontweni edlule kubonakale i-Uefa ivumela idlanzana labalandeli emidlalweni yayo yeChampions League emazweni abalelwa ku-27.
Kuvunyelwa u-30% wabalandeli beqembu lasekhaya.
Kulandele iFrench Football League (FFL) evumela abalandeli abawu-5 000 kuya ku-7 000.
EGermany khona kuthiwa bamukela u-20% womthamo othathwa yinkundla.
I-Uefa ibeke umbandela othi uma isibalo sabatheleleka ngegciwane sinyuka ngo35% kubantu abawu-100 000, ezinsukwini eziyisikhombisa ngaphambi komdlalo, ngeke bavunyelwe abalandeli.
UMicky Modisane okhulumela uMnyango wezeMidlalo kuzwelonke, uthe ngeke nangephutha izihlwele zibuyele ezinkundleni.
Uthe abapholise izinhliziyo abebenethemba njengoba kuza nowamanqamu eMTN 8 oseMoses Mabhida Stadium, eThekwini, ngoMgqibelo.
“Ngiyakuqinisekisa kubantu bakithi ukuthi okwamanje kabakavunyelwa abalandeli ezinkundleni. Nawo la mazwe aselivumele idlanzana kubukeka sanda isibalo sabahaqwa iCoronavirus. Kuleli kasifuni ukuzifaka enkingeni efanayo. Njengamanje siyabona ukuthi igciwane liyenyuka. Ungqongqoshe (uzomemezela uma sezivunyelwe izihlwele, konke kuzoncika ekwehleni kwegciwane,” kusho uModisane.