UMazinyo wembule isu lokutakula i-United
UMQEQESHI weMaritzburg United u-Ernst “Mazinyo” Middendorp, uveza isikhali abona sizosusa iTeam Of Choice endaweni embi kwi-log yeDStv Premiership.
EzikaMiddendorp zithole iphuzu lokuqala (ngemuva kwemidlalo eyisithupha), zidlala ngokulingana neMamelodi Sundowns ngo 1-1 ngempelasonto emdlalweni obuseHarry Gwala Stadium.
Igoli leSundowns lishaywe uThemba “Mshishi” Zwane ngesiwombe sokuqala, kwathi elokulinganisa leqembu lasekhaya lashaywa uKwanda Mngonyama ngesiwombe sesibili.
Lo mphumela ubusho ukuthi iTeam Of Choice ithola iphuzu layo lokuqala seloku kuqale isizini. Leli phuzu belingasho ukuthi leli qembu liyasuka emsileni kodwa belisho isiqalo sezinto ezinhle ngokusho kukaMiddendorp.
“Luselude ukhalo. Ngeke izinto zishintshe njengamanje, zizothatha isikhathi,” uqale washo kanje uMiddedorp oxoshwe yiKaizer Chiefs ngesizini edlule emuva kokuhluleka ukunqoba isicoco seligi esehlale esicongweni se-log isikhathi esingangonyaka.
Eqhubeka echaza lo mqeqeshi ube eseveza isikhali abona ukuthi sizobuyisela iMaritzburg kwedume ngakho.
“Kunoma yiliphi iqembu njengomqeqeshi ofika kulona, uqale ubheke uhlobo lwabadlali iqembu elinabo. Kawuvele nje udlale ibhola elithandwa nguwena. Ubheka uhlobo lwabadlali, bese uzama ukuthola izisombululo sezinkinga ozozifica. Yilokho mina engikubona kusiza,” kusho uMiddendorp othe akakungabazi ukuthi leli qembu lizobuyela ebholeni lalo.
Le nkulumo kaMazinyo mayelana nohlobo lwabadlali, uyisho ngesikhathi iqembu lakhe elidala iChiefs lidonsa ngodizili izinto zingahambi neze kahle, ikakhulukazi kwiDStv Premiership.
Phakathi kokugxekwa okutholwe uGavin Hunt selokhu kuqale isizini, ukuthi ngabe wehlulwa yini ukusebenzisa abadlali abafanayo nabakade besetshenziswa uMiddendorp, athole nabo indawo yesibili kwiligi?
Le nkulumo kaMiddendorp, kubukeka sengathi iphendula ngqo, okumenze yena wakwazi ukwenza kahle naMakhosi, ngabadlali abafanayo.
Ebuzwa uMiddendorp ukuthi uzoyenza yini iMaritzburg iphinde isatshwe, uthe: “Yebo kuzokwenzeka. Kodwa ngeke kube manje ngoDisemba noma ngoJanuwari. Kuzothatha isikhathi.
“Kunabadlali abafikayo eqenjini abasadinga ukucathula, konke lokhu sizokwenza ngokubambisana, sakhe ngaphandle kokuxhamazela”.