UHunt uxakwa wubuthuntu ebagadlini beZimpofana
UMQEQESHI weKaizer Chiefs, uGavin Hunt, uzwakala esephelelwe ngamasu okuxazulula inkinga yokuhluleka ukushaya amagoli kwabadlali bakhe.
IChiefs idlulele esigabeni sokuqala somqhudelwano iCaf Champions League emuva kokuhlula iPWB Bamenda yaseCameroon ngoMgqibelo kowomlenze wesibili.
La maqembu adlale ngokulingana ngo 0-0. Nokho Amakhosi adlulela phambili ngenxa yokuthi awine ngo 1-0 wegoli lika-Erick Mathoho kowokuqala ekuhambeni ngesonto eledlule.
IChiefs izobhekana nePremiera de Augusto yaseAngola ngoDisemba 22 ekhaya kowomlenze wokuqala wokuhlungela ukungena esigabeni samaqoqo. Owomlenze wesibili uzoba sekuhambeni ngoJanuwari 6.
UHunt uthe nakuba bedlulele phambili kwiChampions League kodwa akakaze akubone ukugejwa kwamagoli okungaka. IChiefs ihluleke wukushaya igoli phezu kokuba idlale neBamenda etheleke kuleli ngosuku lomdlalo.
“Ngiphoxekile ngalo mdlalo. Asikwazi ukugeja amathuba angaka phambi kwamapali. Angicabangi ukuthi eminyakeni engu-30 ngiqeqesha, ngake ngayibona into enjena. Kuyaphoxa kodwa obekubaluleke kakhulu wukudlulela phambili. Kusobala ukuthi kungani abagadli bethu bengawashayi amagoli. Asiwasebenzisi amathuba,” kusho uHunt.
Kusukela kuqale isizini 2020/2021, iChiefs inenkinga yokushaya amagoli. Abagadli abathenjiwe okukhona kubona uKhama Billiat, Bernard Parker, Lebogang Manyama bawuzwa ngendaba umsindo wenethi. ULeonardo Castro usashaye amagoli amabili kuphela nokwenzeke bebhekene neLamontville Golden Arrows emdlalweni ophele ngo 2-2.
“Ngamathuba esiwakhile esiwombeni sokuqala besingashaya angazi amagoli amangakhi. Esiwombeni sesibili kwenzeke okufanayo. Kufanele sishaye amagoli okuyinto esingayenzi. Kuyinkinga lokho selokhu kuqale isizini. Awukwazi ukujabulela ukuthi awungenelwa ngamagoli uma ungawashayi. Asingenelwanga goli ekhaya nasekuhambeni kodwa laba bantu basemuva kabi ngokwezinga lePSL. Ngakho kufanele senze okungcono.
“Bayizikhondlakhondla kunalaba esijwayele ukudlala nabo kodwa sibavule kaningi ekhaya nasekuhambeni,” kusho uHunt.
Kusasa, uHunt uzolindela okungcono kubagadli bakhe uma iChiefs isibhekene neBlack Leopards emdlalweni weDStv Premiership eFNB Stadium ngo-7.30 ebusuku.
Khonamanjalo; iBloemfontein Celyic edlala kwiCaf Confederation Cup idlulele esigabeni esilandelayo sokuhlungela amaqoqo ngemuva kokunqoba iManiema Union ngo 3-2 kumaphenathi.
Umdlalo womlenze wesibili ubunqotshwe yizivakashi ngo 2-0 ekubeni neCeltic yawina ngalo mphumela ekuhambeni ngesonto eledlule. Lokhu kuphoqe ukuthi kuyiwe emaphenathini.