U-Holly Rey upheka uhlelo lwethelevishini
ISITHUKUTHEZI sokuhlala endlini ngesikhathi imithetho yomvalelandlini isaqinile nyakenye siholele ekutheni umculi, uHolly
Rey, aziqophe ebhaka okuyinto esizale uhlelo lwethelevishini.
U-Holly, wodumo lwengoma ethi Deeper, usungule uhlelo, iBaking With The Reys, nodadewabo, uMimi Rey, okuyinto abaqala beyifaka kwi-Instagram.
Uthe ukuthandwa kwevideo yabo kubagqugquzele ukuthi baqhubeke nokwenza okunye.
"Njengamanje senza iBaking With The Reys okuwuhlelo olukhuluma ngokwenza ukubhaka kube yinto elula futhi yenziwe nayizingane nokuvuselela uthando lwakho. Singamantombazane ahlala emndenini onamalungu aneminyaka ehlukene futhi ubudlelwano phakathi kwethu bugcwele amahlaya nokugconana okujabulisa ababukeli," kusho uHolly.
Uthe inkampani yakhe, iRey Music, ibe nenhlanhla yokuthola uxhaso lweNational Film and Video Foundation, okuyilo olwenze bakwazi ukuqala ukuqopha uhlelo lwabo.
Uthe kuyona ukusebenza nabesifazane kakhulu.
"Ngaso sonke isikhathi uma kukhona engikwenzayo ngibheka ukuthi ngingabavulela kanjani abesifazane amathuba, ngizama izindlela zokubambisana nabanye besifazane embonini."
Lo mculi, oneziqu zeMedia and Cultural
Studies zaseNyuvesi yaKwaZulu-Natal, uthe usebenzisa zona emsebenzini wakhe futhi kade ayefisa ukuba nenkampani ekhiqiza izinhlelo.
"Kule minyaka edlule bengilokhu ngididiyela izinhlelo esiteshini esibizwa ngeVivanation
TV, esihlanganisa izinhlelo eziteshini zase-Afrika nase-Amerika. Ngesikhathi somvalelandlini senze uhlelo lokuvakasha olubizwa ngeReady Set Local futhi ngiyaqhubeka nokuqhamuka nezinto ezintsha nokuthola amava njengomdidiyeli nenkampani yami."
Yize ematasa nalokhu kodwa usanda kukhipha ingoma entsha, iSpend My Time, athe yenza kahle kakhulu ezitolo futhi iyadlalwa nasemisakazweni.