Kubulawe usomatekisi engena kwakhe
UDUTSHULELWE kwakhe esemotweni washona usomatekisi kasoseshini wamatekisi eWaterloo, eVerulam, ngoLwesibili ebusuku.
Usomatekisi, obaziwa ngokuthi uGumbi (49), udutshulwe amahlandla amathathu, kabili engalweni yakwesokudla nasesifubeni.
Kuthiwa ubesanda kupaka iToyota Corolla abehamba ngayo kwaqhamuka owesilisa omdubule amahlandla ayisithupha ebhekise kuye.
Usihlalo wamatekisi eWaterloo, ozibize ngoShandu kodwa wangathanda negama lakhe, ukuqinisekisile ukuthi obulewe wuGumbi futhi ubesembonini yamatekisi.
UShandu uthe akanalo ulwazi oluphelele mayelana nalesi sehlakalo.
“Kulukhuni ukuchaza ukuthi ukudutshulwa kukamufi kuhlobene nemboni yamatekisi noma cha.
“Asazi ukuthi udutshulwe ngubani futhi bekwenzenjani. Ngingathi ngiyachaza kanti sengisho okungekhona,” kusho uShandu.
Uthe ngabaseshi okumele baphenye imbangela mayelana nalesi sigameko.
UMnuz Prem Balram, ongumkhulumeli wenkampani yonogada, iReaction Unit South Africa (Rusa), uthe bafike bathola amagobolondo ayisithupha esibhamu i-9mm endaweni yesehlo.
“Sibikelwe ngabazibonele ukuthi umufi ubepaka imoto yakhe kwakhe, engakehli, kwaqhamuka owesilisa wamdubula ngezinhlamvu eziyisithupha. Kusolakala ukuthi lesi sigameko sihlobene nemboni yamatekisi nakuba lokhu kungaqinisekisiwe,” kusho uBalram.
Okhulumela amaphoyisa KwaZulu-Natal, uColonel Thembeka Mbele, uthe kuvulwe icala lokubulala eliphenywa ngamaphoyisa asesiteshini eVerulam.
UCol Mbele uthe kusolakala ukuthi ngabo6.30 ngoLwesibili ntambama kudutshulwe owesilisa ngabasolwa abangaziwa ngesikhathi ehleli emotweni yakhe emzini osemgwaqweni, uNkululeko, eWaterloo.
Uthe umufi ubenamanxeba okudutshulwa emzimbeni kanti uhlonzwe njengoshonele endaweni yesigameko.