Bawotha ubomvu kwaButhelezi ’ngokudelelwa’ kukaShenge
SIWOTHA ubomvu isizwe saKwaButhelezi ngesikubize ngokwedelelwa endlunkulu kukaNdunankulu kaZulu, uMntwana uMangosuthu Buthelezi.
Emhlanganweni obuthanyelwe yizinduna nesizwe saKwaButhelezi, kugxekiwe ukuhlaselwa ngamazwi koMntwana. Emhlanganweni obusoLundi ngoMsombuluko, isizwe saKwaButhelezi sisole indlunkulu ngokwehluleka ukuvikela uMntwana ekuhlaselweni.
Basole kakhulu uMntwana uThokozani Zulu, ngokuba ngubhongoza kwabakubize ngokuhlaselwa kukaMntwana.
Ibambabukhosi uMpikayise Buthelezi, lithe libhule umlilo kukubi, kukhona abafuna ukuphaka impi bayibhekise kuMntwana uThokozani.
UButhelezi uthe bafuna ukuba nomhlangano nendlunkulu ngalolu daba.
“Isizwe saKwaButhelezi sikhale ngabaNtwana abangazange bamvikele uShenge edelelwa (nguMntwana) uThokozani. Abanye bebethi mayihlome ihlasele kepha sabuye sabona ukuthi isikhathi sempi kasisekho.
“Yingakho isizwe sicele kube nomhlangano nendlunkulu lapho sizozwakalisa ilaka lethu.”
UButhelezi uthe isizwe sikaZulu kasikwazi ukuma ngaphandle kwesizwe saKwaButhelezi.
Uthe likhulu iqhaza elibanjwe yisizwe saKwaButhelezi esizweni sikaZulu.
“Kusukela kuNgqengelele owaba ngundunankulu kaZulu, kwalandela inkosi uMathole, ezala uButhelezi, nayo eyabe ingundunankulu kaZulu.”
UButhelezi uthe bona bajabule ngendlela uButhelezi asiphethe ngayo lesi sikhundla.
“Bonke abebesemhlanganweni bathe bayambonga uShenge ngokukhuluma iqiniso.”
Imizamo yokuzwa uvo lokhulumela indlunkulu, uMntwana uThulani Zulu, kayizange iphumelele.
Ezikhulumela ephepheni Isolezwe izolo, uMntwana uThokozani, unqabile ukuphendula imibuzo eminingi ngodaba lokujikijelana ngamazwi kwabanye babaNtwana basendlunkulu noShenge.
UMntwana uThokozani uthembise ukubiza isithangami sabezindaba maduze lapho ezogeqa amagula ngokwenzeka endlunkulu.
UMntwana uThokozani ube sematheni ngesikhathi esukuma ecela ukubuza emhlanganweni okwafundwa kuwo incwadi yefa eqoka iSilo, uMisuzulu kaZwelithini.
Kwasuka isiphithiphithi kulowo mhlangano emuva kokusukuma kwakhe, okwaholela ekutheni iSilo siphume ngesamagundwane.