Ithimba lizocubungula izisombululo ngesivuvujikelele eKZN
UKUSHINTSHA kwesimo sezulu ngendlela engajwayelekile okubizwa ngesivuvujikelele kwenze uhulumeni waKwaZuluNatal, wasungula ithimba elizocubungula izisombululo ezinkingeni ezilethwa yilesi simo.
UNdunankulu waKwaZuluNatal, uMnuz Sihle Zikalala, izolo uthe ithimba lihlalelwe wumsebenzi omkhulu wokuqinisekisa ukuthi izisombululo ezizohlenga umhlaba kwisivuvujikelele, zibuye ziwulaphe ziyasebenza.
Indikimba yomhlangano wayizolo ibithi Working Together to Achieve Green and Climate Smart Economic Recovery.
UZikalala uthe uhulumeni uzosebenzisana nezinhlaka zomphakathi ukuvikela umhlaba kwisivuvujikelele kusukela kosolwazi basemanyuvesi, osomabhizinisi nezinhlangano ezizimele zomphakathi.
Uthe umhlangano wesivuvujikelele ufika ngesikhathi izwe libhekene nenkinga yeCovid-19 eshiye abaningi bengakwazi ukuziphilisa. UZikalala ukhumbuze abantu ngesishingishane u-Idai esashiya kukhalwa eMozambique, Malawi naseZimbabwe ngemva kokufa kwabantu abalinganiselwa ku-1 000, sabhidliza imizi ewu-200 000.
Uqhube wathi KwaZuluNatal kuye kwaba nezikhukhula ezinzima ngePhasika lango-2019 lapho kwashona abantu, kwabhidlika imizi nengqalasizinda. Ucele ithimba lesivuvujikelele ukuthi lihambise umyalezo emakhaya, ukuze baqonde kabanzi ngale nkinga bakwazi nokuvikela umhlaba.
UNgqongqoshe wezokuThuthukiswa koMnotho, ezokuVakasha neMvelo KwaZuluNatal, uMnuz Ravi Pillay, uthe kuqala kancane ukuhlenga umhlaba kwisivuvujikelele, akudingi izindodla zemali.
Wenze isibonelo ngokuthi maningi amanzi amoshekayo komasipala nasemphakathini ngenxa yamapayipi avuzayo wathi lokhu kungagwemeka ngokuthi kulungiswe ingqalasizinda masinyane kungalindwa ukuthi kube nesomiso.
“Ikhona imali yezinhlelo zokulwa nezinkinga ezilethwa yisivuvujikelele kodwa nathi kumele sisheshe sisukume ukugwema izinkinga.
Akufanele kuthathe isomiso ukusikhumbuza ukuthi amanzi abalulekile. Kufanele siwonge singakafiki nokufika isomiso, ngokuthi sisheshe silungise ingqalasizinda yethu uma ivuza,” kusho uPillay.
UMnuz Moses Tembe onguSihlalo weKZN Growth Coalition, uthe kuyamjabulisa ukubona ithimba lesivuvujikelele futhi uyathemba ukuthi lizohlela kahle ukuze iKwaZulu-Natal ibe nezisombululo zokubhekana nalesi simo. Uthe kwamphatha kabi ukufika kweCovid-19, eyagasela izwe lingenazo izinhlelo ezifanele.
“Inkinga yesivuvujikelele idinga ukusukunyelwa ngoba inomthelela omubi wokuphendula abantu ondingasithebeni uma izindawo zabo zihlaselwa yisimo sezulu esibi. Kufanele sibe namabhizinisi angayilimazi imvelo kodwa siqhubeke nokukhulisa umnotho,” kusho uTembe.