Akukho holidi ezikoleni ngosuku lomenyuko
SEKUQUBUKE indida kwabanye abazali bezingane ezitshelwe ukuthi zingayi namhlanje ezikoleni KwaZulu-Natal, ngoba zizobe zivaliwe.
Kuthiwa yingoba kuzobe kuwusuku lomenyuko ngakho abafundi abangayi ezikoleni baze beze kusasa.
Omunye umzali wengane efunda kwesinye sezikole eMlaza ocele ukungadalulwa, uthe bathole incwadi evela esikoleni ibazisa ukuthi izingane zingayi namhlanje ngoba kuzobe kungafundwa ngenxa yokuthi usuku lomenyuko.
Uthe lokhu kumdidile ngoba bazi ukuthi alikho iholidi ngakho kusho ukuthi isikole siyazenzela iholidi laso.
“Kungididile ukuthi ingane yami kuthiwe ayingezi ngoba kuwusuku lomenyuko. Kuthiwe ayize ngoLwesihlanu lapho kuzobe sekukhishwa namaripoti ekota yokuqala yonyaka,” kusho umzali.
Omunye umzali wengane efunda kwesinye sezikole esasaziwa ngeModel C ePinetown, naye ocele ukungavezwa, uthe ekuqaleni kwesonto bathole izincwadi ebezithi izingane zabo zingezi ezikoleni.
Uthe kodwa izolo kufike esinye isigijimi sesicacisa ukuthi abafundi abeze ngoba kuzobe kufundwa.
“Kuyaxaka ukuthi sithole okunye, gwiqiqi sekuyashintshwa futhi kuthiwe izingane azize. Omalume abalanda izingane abafuni ukuyizwa eyokuhambisa izingane zethu ngoba bathi akufundwa ezikoleni eziningi ngoba usuku lomenyuko,” kusho lo mzali.
UMnuz Kwazi Mthethwa okhulumela uMnyango wezeMfundo eKZN, uthe ngoMeyi lilodwa kuphela iholidi, uSuku lwaBasebenzi uMeyi 1.
Uthe ngaphandle kwaleli holidi alikho elinye elinikwe izikole noma abafundi.
“Uzokhumbula ukuthi iCovid-19 ibambezele ukuqala kokufunda cishe ngamasonto amabili. Manje sisilele emuva ngezifundo, asikwazi ukuthi singaba nosuku olulahlekayo kungafundwa ekubeni singekho isizathu esibambekayo.
“Silindele ukuthi kufundwe ngokujwayelekile ezikoleni zesifundazwe. Uma kukhona isikole esivaliwe sekuyomele uthishanhloko achaze kabanzi ukuthi imvume yokwenza lokho uyithathephi,” kusho uMthethwa.
Uthe nabo bazobe besebenza emcimbini oseMajuba lapho uNgqongqoshe walo mnyango uMnuz Kwazi Mshengu, ezobe ekhipha khona ama-tablet okuwumkhankaso abawenza neMTN.