Kushone isalukazi kusha umuzi
UPHITHENE amakhanda umndeni waseChesterville oshonelwe ngugogo, okubikwa ukuthi ushiswe wumlilo okungaziwa ukuthi udalwe yini, ngoLwesibili ekuseni.
Kuthiwa kulo muzi womndeni wakwaMuthwa bekunomufi, uNkk Siyasenkani Muthwa (86), abazukulu nesizukulwane sakhe ngesikhathi kugqamuka umlilo egunjini lokulala.
Izingane zabazukulu bakhe, kuthiwa ziphume zabaleka egunjini ebezikulo.
Kuthiwa zifike emnyango zatshela unina noninalume ngomlilo obusegunjini obekulele kulo ugogo.
Kubikwa ukuthi unina noninalume wengane bajike ephaseji lendlu bebona umlilo, abazange besakwazi ukukhipha ugogo ngenxa yelangabi.
Kubikwa ukuthi kulamule ukufika kwamalungu omphakathi azame ukucima umlilo ngamanzi kusetshenziswa ibhakede.
Abezicishamlilo kuthiwe bafike ilangabi lomlilo selidambile.
Ugogo uphuthunyiswe esibhedlela iKing Edward.
Indodakazi kamufi, uNkk Sphiwe Ndlovu, ebisetohweni ngesikhathi kwenzeka isigameko, ithe izwe isithintwa ngomakhelwane beyazisa ngesehlakalo.
“Ngibuye ekhaya sekonakele kakhulu. Akukho nokukodwa abakwazile ukukukhipha endlini ngenxa yomlilo, okuthiwa wubunamandla kakhulu. Sisele nesikugqokile nje kuphela njengoba ngikhuluma nawe. Kubuhlungu emoyeni njengoba sesithole nezindaba ezithi umama usesishiyile emhlabeni.”
Ithe babamba bayayeka kumanje, kabazi ukuthi kumele bagxile kuphi njengoba zonke izinto zimapeketwane.
“Siphithene amakhanda ngoba kumele sithole indlela esingasizakala ngayo njengoba kushe yonke impahla yethu. Sekufanele sihlele umngcwabo-ke manje,” kubeka uNkk Ndlovu.
Ikhansela lendawo, uMnuz Mveli Mthembu, lithe udaba lwalo mndeni seludluliselwe ophikweni lwezinhlekelele.
“Sesilinde ukuthi abethimba lezinhlekelele balethele lo mndeni ukudla nezingubo zokulala.
Uphiko lwezezindlu nalo bese lubikeliwe,” kubeka uMthembu.
Okhulumela abezicishamlilo, uMnuz Nkulumo Dube, uthe ithimba labo lifike kunezimpahla ezimbalwa ezikhishwe emzini walo mndeni.
Uthe umlilo ubusuthe ukwehla njengoba bese kusha amagumbi amabili kuphela.
Kuze kwashaya isikhathi sokushicilela amaphoyisa engakaphenduli.