Bashayekile onesi ngenxa yeCovid-19
ABAHLENGIKAZI benza umsebenzi obaluleke kakhulu esizweni kodwa uma kumele babhekelelwe ngokwamaholo, nangezinsiza zokubaphephisa, abanakwa.
UMengameli weDemocratic Nursing Organisation of SA (Denosa), uMnuz Simon Hlungwani, uthe onesi banikela ngempilo yabo benza umsebenzi wesizwe wokuhlenga abantu kodwa abanakekelwa bayahlukunyezwa kwesinye isikhathi banganikezwa nezinsiza zezokuzivikela emsebenzini.
"Abanikezwa umhlomulo wokuthi benza umsebenzi obucayi, iholo abalitholayo lenza ukuthi abanye babo bangakwazi ukuthenga imizi, izingane zabo azihlomuli ngaphansi kwesikhwama esisiza abafundi abazalwa emindenini empofu iNsfas," kusho uHlungwani.
UHlungwani ubekhuluma izolo ngesikhathi kugunjwa Usuku lwabaHlengikazi (International Nurses Day). Uqhube wathi abahlengikazi bafundile kodwa uma sekumele babe yingxenye yobuholi obuthatha izinqumo ngezinto ezithinta ezempilo, abanikezwa lelo thuba.
Iphini likaNgqongqoshe wezeMpilo kuleli uDkt Joe Phaahla, lithe bewumnyango bayalibona iqhaza elibanjwa ngabahlengikazi emkhakheni wezempilo.
"Onesi basiza emikhakheni ehlukene yokwelapha nasophikweni lwezingozi. Ohlelweni lokunqanda ukusabalala kwegciwane lengculazi nasekwelashweni kwalo, abahlengikazi yibona abahamba phambili. Kuleli bangaphezulu kuka-5 million abantu abathatha imishanguzo yokuthiba iHIV, konke lokhu besingeke sikwenze ukube bebengekho abahlengikazi," kusho uDkt Phaahla.
Uthe ukuhlasela kweCovid-19 kufake ingcindezi emsebenzini owenziwa ngabahlengikazi.
"Abasebenzi bezempilo abangu-50% kuya ku-60% ababhekene ngqo neCovid-19, ngabahlengikazi. Kungalesi sizathu sithathe isinqumo sokuthi abasebenzi ababhekene ngqo negciwane kube yibo abagonywa kuqala kuleli. Ngeshwa izinto kazihamba ngendlela ebesihlele ngayo, umgomo i-AstraZeneca esasiwuthengile kwadingeka ukuthi ungabe usasetshenziswa sase senza olunye uhlelo lokugoma ngeJohnson & Johnson. Emasontweni amabili azayo sinethemba lokuthi abasebenzi bezempilo abasele bazogoma, abanye ngomgomo okhiqizwa yiPfizer, abasalayo bazogoma ngeJ&J esazofika," kuchaza uPhaahla.
UNkk Sizeni Mchunu womkhandlu wabahlengikazi, iSA Nurses Council, uthe ngonyaka odlule abahlengikazi babhekane nobunzima obungakaze bube khona kuleli, lapho bekumele basebenze isikhathi esengeziwe ngenxa yobuningi beziguli.
"Abanye abahlengikazi bese behlala ngokwehlukana nemindeni yabo ngoba beyivikela. Ukuhlasela kwegciwane kusikhumbuze ukuthi ezempilo aziyilutho ngaphandle kukanesi," kusho uNkk Mchunu.
Ngokusho kukaMengameli weYoung Nurses Indaba Trade Union, uNksz Lerato Mthunzi, ukuhlasela kobhubhane iCorona kushiye abahlengikazi begula, benezinkinga zokhwantalala okubenza ukuthi bangabe besawenza umsebenzi wabo ngendlela efanele.
"Ungaze ucabange ukuthi onese abasanakekeli kanti cha, nabo bayagula. Bakhathele futhi badinga usizo kodwa abalutholi," kusho uNkk Mthunzi.
UNkk Nobukhosi Xulu weNehawu, ucele ukuba kulungiswe izinkinga zokungalingani ngaphakathi kulo mkhakha. Wathi kumele kuphuculwe umkhandlu wabahlengikazi okuyiwo othatha izinqumo zokujezisa abahlengikazi.
"Ezikhathini eziningi lokho kwenziwa kungazange kubhekwe ukuthi ngabe ingqalasizinda yokusebenza beyikhona, yokuthi unesi enze umsebenzi wakhe ngendlela," kusho uNkk Xulu.