I-SACP yeseka uKhongolose empini yokulwa nenkohlakalo
I-SOUTH African Communist Party (SACP) yamukele isinqumo se-ANC sokumisa ezikhundleni amalungu ayo anamacala enkohlakalo nabucayi ezinkantolo.
NgoMsombuluko, i-ANC iphothule umhlangano wesigungu esiphezulu odonse izinsuku ezintathu. Kuvele ukuthi kukhona abaholi abazishenxele ngokwabo kwathi labo abahlulekile babhalelwa izincwadi ezibamisayo.
I-SACP ithe nayo izoqhubeka nohlelo lwayo lokuqondisa ubugwegwe amalungu ayo anamacala enkohlakalo nabucayi ezinkantolo.
Esitatimendeni esithumele emva komhlangano we-ANC, i-SACP income isinqumo sikaKhongolose sokumisa abagoloze ukushenxa ezikhundleni yathi yisinyathelo esihle ekulweni nenkohlakalo.
Ithe kuzoba yisifundo nakwabanye abebesacabanga ukuzimbandakanya nezenzo zenkohlakalo.
Omunye wabaholi ababhalelwe incwadi emmisa enhlanganweni uNobhala jikelele uMnuz Ace
Magashule. Lo mholi akahlangabezananga nomnqamulajuqu wezinsuku ezingu-30 ayebekelwe wona nabanye abanamacala ezinkantolo
Leli qembu liveze nokuthi liyayeseka iKhomishana kaZondo, ephenya ngezinsolo zokulawulwa koMbuso yidlanzana.
Ithe iyaweseka uKhongolose empini yawo elwa nenkohlakalo yanxusa amalungu amadlela ndawonye nomphakathi wonkana ukuba benze okufanayo.
I-SACP iyalweseka uhlelo lokuhlelwa kabusha kwenhlangano yomakadebona bezempi uMkhonto Wesizwe nokuqinisekiswa kobulungu bamalungu ayo.
Le nhlangano ithi iyasamukela isinqumo se-ANC sokulwa nodlame lwangokobulili yathi izosebenzisana nayo ekulweni lempi.
AmaKhomanisi anombono ofanayo nowe-ANC efuna kuqiniswe ubudlelwano namaxhama ezokuxhumana nezwe iCuba.