I-NUM isola i-Eskom ngokuholela kancane abasebenzi

I-NATIONAL Union of Mineworkers (NUM) izwakalise ukunganami kwayo ngezinhlelo zokunqamuka kukagesi ezenziwa yi-Eskom nokuholela abasebenzi kancane.

I-NUM ithe akusilona iqiniso ukuthi abasebenzi abaningi be-Eskom bahola ngaphezu kukaR700 000 ngoba abahola kancane bathola uR174 180 ngonyaka.

Iveze ukuthi iningi labasebenzi abakhulunyelwa yizinyunyana bahola kancane nabahola ngaphezu kukaR600 000 ngonyaka.

“Sisibonile isitatimende se-Eskom esidukisa umphakathi uma sithi abasebenzi abaningi bahola uR737 000 ngonyaka. Ngamanga lawa ngoba amaholo akwaEskom asahanjiswa ngokobuhlanga.

“Sithole ukuthi abasebenzi abamnyama bahola kancane kunozakwabo abamhlophe. Sifuna i-Eskom iyilungise le ndaba ngoba isaholela abantu ngendlela yobandlululo,” kusho uMnuz William

Mabapa onguNobhala jikelele weNUM osabambile.

Uthe bafuna amaholo anyuswe ngo-15% futhi badinga umhlangano nesikhulu esiphezulu, uMnuz Andre de Ruyter.

Kulindeleke ukuthi umhlangano wenzeke ngoMeyi 17, uma uDe Ruyter esenesikhathi.

I-NUM ithe ikhathazekile ngezinhlelo zokunqanyulwa kukagesi izikhawu, okwenzeka kakhulu ezindaweni ezihlala abantu abamnyama. Icela i-Eskom ukuthi iwuyeke lo mkhuba.

I-National Union of Metalworkers South Africa (Numsa) ikhale ngokuthi kunezinhlelo zokulwa ne-Eskom ngamabomu njengoba sekuthulwa abakhiqizi bakagesi abazimele.

UNobhala jikelele weNumsa, uMnuz Irvin Jim, uthe akufanele ugesi ukhiqizwe yizinkampani ezizimele ezikhokhelwa yi-Eskom ngoba le nkampani kayinayo imali.

Uthe kufanele i-Eskom iqhubeke ikhiqize ugesi, ukuze ikwazi ukwenza imali futhi ibe nozinzo.