Akuphenyisiswe ngezinsolo zokuhlukunyezwa kwabesifazane
IMPI yokulwa nesihlava sodlame olubhekiswe kwabesifazane iyize uma amaphoyisa engaphenyi ngokufanele bese ebopha abasolwa ngokuhlukumeza abalingani babo.
Izinsolo zokuhlukumeza ngokobulili sezenziwe kumculi we-hip hop uKiernan Jarryd Forbes, owaziwa ngelika-AKA, nakuDJ uNkosinathi Maphumulo, odume ngelikaBlack Coffee.
U-Anele “Nelli” Tembe, ingoduso ka-AKA futhi oyindodakazi kasomabhizinisi waseThekwini uMoses Tembe, ushone emuva kwezinsolo zokuthi wagxuma esuka esesitezi sika-10 ehhotela laseKapa.
Emva kwalokho imithombo yabezindaba iveze ubufakazi ngobudlelwano obebunezinxushunxushu, lapho uNelli ahlukunyezwa khona - okusolwa kukho u-AKA.
Kushicilelwe izithombe zesigameko lapho kusolwa ukuthi u-AKA wephula isivalo ukuze angene egunjini okwakuzivalele kulo uNelli.
UBlack Coffee usolwa ngokushaya owayengunkosikazi wakhe, uMbali Enhle Mlotshwa, okuholele ekutheni afune incwadi yokuvikelwa.
Udaba luphambi kwenkantolo, emuva kokuthi u-Enhle emvulele amacala okuhlukumeza.
Yize u-AKA noBlack Coffee bekhiphe izitatimende bephika ukuthi kukhona okungahambanga kahle kodwa izinsolo ezibhekiswe kubo zinzima futhi akumele zinganakwa.
Kasisho ukuthi sekufanele behlulelwe umphakathi ngoba banelungelo lokwethula uhlangothi lwabo enkantolo yomthetho efanelekile.
Kodwa-ke, kufanele kuqashelwe futhi kugwemeke ukwakheka kwesithombe sokuthi bayenzelelwa ngoba bengosaziwayo.
Yize amaphoyisa ekubeke kwacaca ukuthi u-AKA akasolwa ekufeni kukaNelli, kepha uma sekuvela ubufakazi obusha obumelena nabekwazi, akufanele anqikaze ukuthatha izinyathelo ezifanele.
Ngendlela efanayo, ukukhalela usizo kuka-Enhle - nezinsolo zokuthi uke wanqatshelwa ukuthola incwadi yokuvikelwa - kumele kuphenywe kahle.
Impi yokulwa nokuhlukunyezwa kwabesifazane nezingane kufanele ibeke eqhulwini ukuvikela abagilwa futhi ibagqugquzele ukuthi babike ngokubehlele. Kodwa-ke lokhu okwenele uma amaphoyisa engezowenza umsebenzi wawo.