Simethulela isigqoko uShenge ukhombise ubuqhawe
MHLELI: Ngokukhulu ukuzithoba nenhlonipho ngicela ukuthatha leli thuba ngibeke uvo lwami kwelakho lodumo eliwela umfula ugcwele ngenhloso yokuphonsa itshe esivivaneni.
Asimbonge esaphila uNdunankulu kaZulu uMntwana wakwaPhindangene ngokumela iqiniso noma ngabe izinto sezinzima kangakanani eNdlunkulu. Imisebenzi yoMntwana iyazikhulumela ngisho ngabe ubungamazisisi kahle kumbe ubungamqondi kwazise uhlezi ebhecwa ngobende inyama engayidlanga
MHLELI: Ngithi ake ngibongele umndeni waseNdlunkulu yakwaZulu ngokukwazi ukuluphatha ngobunono udaba lokubekwa kweSilo yize kade bebhekene nezingqinamba.
Ukubekwa noma ukukhetha ozongena esihlalweni sobukhosi akusiyo into elula, nongayenza ngokuxhamazela ngoba ujahe ukuvala isikhala esivulekile ngokukhothama kweSilo, kudinga ubuhlakani nolwazi olunzulu mayelana namasiko esintu ayelandelwa mandulo.
Siyisizwe samaZulu siyaziqhenya ngani ikakhulukazi uMntwana waKwaPhindangene, silibonile igalelo lakho Shenge uyindoda yamadoda, mancane amadoda anjengawe akwazi ukumela iqiniso. Ulimele iqiniso endlini ngenxa yepolitiki eshibhile eseNingizimu Afrika.
Asenzele kona eNdlunkulu siyisizwe samaZulu kukhulu ngendlela engachazeki kwazise ngisazibuza ukuthi ukube akuyena onguNdunankulu kaZulu omunye obezohlala kulesi sihlalo ubezokwazi yini ukwenza wonke lo msebenzi onzima nobucayi kangaka. Kusukela kudunguzela iSilo samabandla onke kuze kube siyakhothama njengoba kuphethe ngokutshalwa kwaso. kuqhubeke njalo njengoba ngokuphazima kweso kuhlabeke kwadunguzela iNdlovukazi kaZulu ebihleli esihlalweni sobukhosi umaDlamini-Zulu.
Kube umshikashika ofanayo nendlovukazi yaze yakhothama laphinda ilanga lashona emini kaZulu kwazise besisazikhotha amanxeba siyisizwe nezilonda zisabhibhile ngokukhothama koNgangezwe lakhe.Nayo indlovukazi itshaliwe ngendlela ethi mayifane kanti ngesikhathi kufundwa incwadi yamafa kwasuka uthuli lwezichwe.Ngilanda wonke lo mlando esiwaziyo ngenhloso yokuqhakambisa amagalelo oMntwana kwazise uyena obesephenduke ijongo ehla enyuka kuso sonke lesi simo engisichaze ngenhla.
Le simo simkhahlameze egazini saphinda samkhahlameza nasemqondweni kwazise nangokweminyaka usekhule kakhulu. Ngimethulela isgqoko uMntwana wakwaPhindangene kwazise ubukhombisile ubuqhawe bakhe. Okukhulu kakhulu ukhombise uthando lwezwe lakhe wamelana neqiniso ngisho impilo yakhe isisengcupheni.
Ngiyayazi imisebenzi kaShenge emihle kodwa ukusiphathela udaba lwaseNdlunkulu ngobunono nangobunyoninco buqinisekise ubuqhawe bakhe ngisho kulabo ebebemngabaza.Ngikuchoma uphaphe lwegwalagwala Sowalisa uqhubeke njalo neqiniso lakho.
Nginethemba lokuthi nabaholi baseNingizimu
Afrika abaklwebhanayo ngenxa yepolitiki uzoba yisibonelo esihle kubona.Ngicela simbonge esaphila uMntwana kaPhindangene ngemisebenzi yakhe emihle.
Phondolwendlovu Mzolo
EMKHAMBATHINI