Indali yezinkomo iqale ngegiya eliphezulu
UQALE ngelikhulu isasasa umkhankaso wokuvuselela ukudayiswa kwemfuyo endalini evulelekile ebiseMcakweni, eBabanango, kanti abafuyi nabathengi bakuthakasele kakhulu njengoba kubavulele amathuba okwenza imali.
Lokhu kuvezwe yikhansela lendawo, uMnuz Mkhawuleni “Shoes” Buthelezi, ngesikhathi exoxa ngendali yezinkomo ebisendaweni engaphansi kweMcakweni Trust, eyakhele iBabanango Game Reserve, eZululand, ngeledlule.
Indali ibisingethwe yi-African Habitat Conservancy Foundation (AHCF) ngokubambisana neBabanango Game Reserve emadeleni asedolobheni laseBabanango.
Indali iyingxenye yohlelo lokufuywa kwezinkomo lapho i-AHCF isebenzisana khona nezinkampani, iMeat Naturally neConservation Outcome, ukuheha abantu bakule ndawo abanemfuyo ukuba babe yingxenye yayo.
UButhelezi uthe izindali zazivamile eminyakeni eyedlule, zafadalala ngokuhamba kwesikhathi njengoba manje sebezivuselela ukuze kwande amathuba emisebenzi nezindlela zokuziphilisa ngemfuyo.
Uthe wethemba ukuthi elandelayo izobanjwa ungakadluli uJuni ukuze imfuyo ingaze iklwebheke ngenxa yamakhaza.
“Bacoshile impela abantu. Ngendlela okuhambe kahle ngayo, indlela abazikhiphe ngayo izinkomo abafuyi naleyo abathengi abathenge ngayo, kuhambe kahle impela.”
UMnuz Sifiso Magwaza weBabanango Livestock
Project naye uncomile, wathi ibe yimpumelelo indali yabo yokuqala yezinkomo.
"Kuhambe kahle kakhulu kanti nabantu bayithakasele impela indali. Phambilini abantu bebehlupheka ngoba bebehamba bayofika kude le koVryheid, Dundee noma eMpangeni. Kepha manje sibasondezele," kusho uMagwaza.
Uthe njengoba bebeseMcakweni, ngokuzayo sebeyohlanganisa eyaseSibongweni neyakwaNgono ukuze banikeze bonke abantu abakhele iBabanango Game Reserve ithuba.
“Abanye bebefika ngenhloso yokuthi basazobona kodwa ubabone sebethenga.”
Uthe abafuyi bavame ukubamema ngezikhangisi, amaSMS nangokubahambela emadiphini.
Eqhubeka echaza, uthe abathengi kuvame ukuthi kube ngabafuyi, osomabhizinisi, abamabhusha, njalonjalo. Izinkomo zifike zifakwe esikalini ukuze kutholakale isilinganiso senani kodwa ukuthi izodayiswa ngamalini ekugcineni kuya ngesasasa kubathengi.
Uveze ukuthi abanye abathengi babheka uhlobo, ikakhulu laba abafuye amaNguni kanti abanye babheka ukuthi isilwane singakanani ngokweminyaka, yinsikazi noma yinkunzi, yinkabi njalonjalo.
Ecelwa ukuba alinganise ngokwamanani, uMagwaza ubeke kanje: “Kufana nendali yezimoto nje. Inkomo ingathi uma ifakwa esikalini iqale la koR7 000 kodwa ngokuqophisana kwabathengi ikhuphuke iye iyoshaya koR11 000 kuya kuR12 000.”
UMnuz Thokozani "TK" Hlophe, ongumxhumanisi womphakathi kwa-AHCF, uthe bafisa ukuthi le ndali ibanjwe njalo ngekota yonyaka kodwa konke kuyoya ngokuthi umphakathi uthini.
"Asizinqumeli thina ukuthi ukudayiswa kwezinkomo lokhu esikuqalile kuzoba kangaki ngekwata kodwa sinesifiso sokuthi kwenzeke njalo. Sekuyoba kubafuyi ukuthi kudayiswa nini.
“Sifisa ukuthi abafuyi bazizwe beyiphethe le nto kungeyabo," kusho uHlophe.
UButhelezi uthe into enhle ngalolu hlelo lokudayiswa kwezinkomo wukuthi kusuke kukhona zonke izinhlaka ezibalulekile, okubalwa kuzo nophiko lwamaphoyisa oluqondene nokwebiwa kwemfuyo.