Abesithembu ababambisene ebhizinisini nasekhaya
UMA abantu besifazane besesithenjini futhi besebancane, kujwayelekile esikhathini samanje ukuthi umuntu ngamunye azimele, abe nebhizinisi eliqondene naye kuphela.
Kodwa abesifazane abane baseMpangeni, abagane esithenjini bona benza okuhlukile njengoba behlanganyele ebhizinisini futhi kabaziboni behlukana kalula.
UNkk Thandeka MhlongoNxele (33) waseNdlangubo, ongunkosikazi wokuqala, washada ngo-2010, uNkk
Nonhle Mthabela-Nxele (24) waseNdlangubo zawushaya ngo2015, uNkk Andile Zungu-Nxele (21) waKwaCeza owagcagca ngo2018 noNkk Aphile Mdunge Nxele (19) waseMelmoth usine ngo-2020. Bangene bagxila ebhizinisinni lezokwakha.
UNkk Mhlongo-Nxele oyimenenje yeGobamashinga Construction & Protection Services, uthe yena nomyeni wakhe uMnuz Sbonelo Nxele, babengamele leli bhizinisi.
Kuthe uma sekufika abanakwabo wabona ukuthi kumele nabo bangene kulo.
Le nkampani ibhekele abasebenzi abanamakhono ahlukene, abangaphezulu kuka20.
"Ngathanda ukuthi nabo bafunde ngebhizinisi, sonke sazi ukuthi imali yekhaya iphathwa kanjani.
“Okubalulekile wukuthi ibhizinisi likhule sindawonye sibambisene ngoba sinamakhono ahlukene. Noma ngiyimenenja kodwa kuningi nabo abalekelela ngakho. Yingakho bebuyele esikoleni. Uma kuphela inyanga siyahola njengabasebenzi," kusho uNkk Mhlongo-Nxele.
UNkk Mthabela-Nxele owenza iBusiness Management eRich Tech, uthe okwenza isithembu sabo sehluke wukuthi bazakhela bona indlela yokuphila, bebheka ukuthi basebasha futhi bayadinga ukuzithuthukisa.
"Singene emshadweni sinothando lokuzithuthukisa. Ngenhlanhla umyeni wethu uyasilekelela.
“Singene esikoleni esisodwa sonke ukuze sikwazi nokufunda ezinye izindlela zokusingatha amabhizinisi.
“Isikhathi esiningi sibhekela ukusebenza kwemali yenkampani," kusho uNkk Mthabela-Nxele.
UNkk Zungu-Nxele, owenza i-Administration, uthe njengoba enza umsebenzi wokucwaninga amabhuku enkampani futhi esebenza, ukubone kubalulekile ukubuyela esikoleni.
"Ukuba sesithenjini kakusho ukuthi sekuphelile ngemfundo nangephupho lakho.
“Senza izifundo ezahlukene kodwa ezisihlanganisayo ebhizinisini," kusho uNkk Zungu Nxele.
Yize esemusha uNkk MdungeNxele kodwa abanakwabo bayamcija futhi bayamlekelela njengoba ethuthukisa izifundo zika-matric.
Ngaphandle kwebhizinisi babuye babhekele inhlangano esiza abahlwempu, iKhanyisamu Foundation eyakhela abantu izindlu, ibathengele ukudla, izimpahla zokugqoka futhi ifundise nentsha ezikoleni.
Noma sebeqalile ukusiza emadolobheni ahlukene esifundazweni kodwa bafisa ukungena nakwezinye izifundazwe, balekelele abantu abahlwempu.
Uma bengematasa namabhizinisi basuke babelana imisebenzi yasekhaya njengoba behlala ndawonye, okungenye yezinto abangafisi ukuyishintsha njengoba izingane zabo zikhula emzini owodwa.