Obezifela ngezinhlelo zokupheka kwiTV usengumpheki
OBEHLALE elwa nomfowabo bebanga ukuthi ufuna ukubuka izinhlelo zokupheka kunokuthi babuke opopayi, usengumpheki.
UNksz Unathi Mavundla
(20) ongowokudabuka ePort Shepstone kodwa osezinze eThekwini, wenza unyaka wokugcina esikoleni esifundisa ukupheka, i-International Hotel School esiseWestville.
Uthe waqala eseneminyaka emihlanu ukupheka, esiza unina ekhishini.
Eseneminyaka eyishumi, uthe ubeseqalile ukupheka ukudla abejwayele ukukubona kuphekwa ezinhlelweni zokupheka ezidlala kwithelevishini.
"Ukuthanda kwami ukubuka izinhlelo zokupheka bekungixabanisa nomfowethu ngoba yena wubefuna sibuke opopayi.
“Besishintshana ngengezinhlelo, okusho ukuthi ophethe isilawuli nguyena okhetha okuzobukwa.
“Uma kuyimina ngizofaka izinhlelo zokupheka. Umfowethu ubecasuka ngoba engaqondi ukuthi kungani ngilokhu ngibukana nezinhlelo zokupheka.
“Ubeze angaboni nokuthi kuphekwa izinto ezehlukene," kusho yena.
Le ntokazi eyenza iProfessional Cookery and Kitchen Management, ibuye ibe ngumbhali wephephabhuku lentsha.
Ibuye yeluleke ngezindlela zokupheka ukudla, ifundise ukupheka ezinkundleni zokuxhumana ngokufaka izithako zokudla lapho ezibiza ngokuthi: MealwithU.
Inamakilasi okufundisa ukupheka futhi ibuye iqashelwe ukupheka emakhaya.
UNksz Mavundla, uthe akakaze abe nephupho lokuthi abe ngudokotela njengezingane eziningi kodwa wubelokhu enothando lwebhodwe.
"Esikoleni samabanga aphezulu ngifunde iConsumer Studies. Lwakhula kakhulu uthando lwami lokuba ngumpheki ngaleso sikhathi.
“Njalo uma ngibuya esikoleni bengibuka uhlelo luka-Ina
Garten, iBarefoot Contessa.
“Ngaqhubeka ngabuka nabanye abapheki kubo okukhona noSiba Mtongana weCooking With Siba. Kwangigqugquzela kakhulu ukubona abesifazane abamnyama baseNingizimu Afrika kwithelevishini benza into engiyithandayo futhi kwaqinisa ukuzethemba kwami kulo mkhakha," kusho uNksz Mavundla.
Uthe njengoba enza iziqu zakhe, okunye ukuqeqeshwa ukuthole eHilton Hotel naseOyster Box.
Uthe wenze ubudlelwano neBentley Lodge & Lifestyle eThekwini, lapho ephekela khona uma eqashelwe ukuphekela izingqunguthela, abuye asebenzise yona le ndawo uma enezinkundla zokucobelelana ngolwazi lokupheka.
"Ngihlale ngiwumuntu omatasatasa kodwa ngenza isiqiniseko sokuthi isikhathi sami ngisihlela kahle.
“Akuyona into elula kodwa ngoba ngazitshela ukuthi akukho okumele kungenzeki kulezi zinto engizenzayo, ngiyazama.
“Angifuni ukungaziqedi izifundo zami ngoba sengiqale ukwenza imali,” kusho uNksz Mavundla.