Ukhala ngonya lwabakaMasipala weTheku obhidlizelwe umjondolo
OWESIFAZANE waseRichmond Farm, eLindelani, ukhala ngonya lwabasebenzi bophiko oludiliza izakhiwo ezisezindaweni zikaMasipala weTheku.
UNksz Lungile Mkhize uthi bamdilizele umjondolo wakhe maqede bashisa yonke into ebiphakathi ngoLwesihlanu ekuseni.
Uthe ubesemsebenzini ngesikhathi ethola umyalezo komakhelwane nakubantu bakubo, bemtshela ukuthi kuyonakala endlini yakhe.
Uthe ufike izimpahla ebezimbondelene ngaphansi komjondolo wakhe, sezishe zonke.
“Ngabe ngiyezwa ukube badilize maqede bahamba. Le yokuthi baphinde bashisa zonke izimpahla zami yiyo engingayizwisisi. Kumanje ngibuyele ekhaya nezingane zami ezine. Akukho lula njengoba nasekhaya sibaningi kakhulu,” kukhala uNksz Mkhize.
Eqhuba, uthe uyafisa ukuthola usizo lwendlu ukuze atholele izingane zakhe ikhaya elifudumele.
“Bengithi ngizama ukwakha ikhaya nezingane zami. Ukube nginawo amandla ngabe kudala ngayithola indawo yethu.
“Sengisizwa yikhona nje ukuthi ngiphila ngamatoho angilekelela ekutheni ngikwazi ukuthenga okuya ngasothunjini.”
Ikhansela lendawo, uNksz Nokufika Biyela, lithe amakhansela awakwazi ukuzihlanganisa nezinkinga zokuthathwa komhlaba kamasipala.
“Angikaze ngizwe lutho ngokusha kwempahla yomuntu. Kodwa sinayo impela inkinga yabantu abadla umhlaba kamasipala endaweni.
Okhulumela uMasipala weTheku, uMnuz Msawakhe Mayisela, uthe umkhandlu uzama ngokusemandleni ukulwa nenkinga yabantu ababeka izakhiwo zabo ngokungemthetho ezindaweni zawo.
“Umasipala ngeke uzuze njabulo ngokulimaza impahla kanjalo nokudiliza izakhiwo ezibekwe ezindaweni okungamele zibe kuzo.
“Yize umkhandlu ubhekene nalezi zinkinga, usalokhu uqhubekile nokuhlinzeka izigidi zemizi mahhala kubantu abebehlala emijondolo nakulabo abangakaze babe nemizi ngaphambilini,” kusho uMayisela.
Ephetha uthe mayelana nalolu daba, ithimba labo lijutshiwe ukuyodiliza izakhiwo eLindelani kodwa alizange lilimaze noma lishise mpahla.
Okhulumela amaphoyisa KwaZulu-Natal, uColonel Thembeka Mbele, usiqinisekisile isigameko sokugasela kwabesilisa abadilize umjondolo emgwaqweni, uKhangela, maqede balimaza impahla yasendlini.
“Kuvulwe icala lokulimaza impahla esiteshini samaphoyisa aseNtuzuma. Amaphoyisa asaphenya,” kubeka uCol Mbele.