I-Sassa icela kubikwe abantshontsha amakhadi ezibonelelo
I-SOUTH African Social Security Agency (Sassa) icele abantu babikele amaphoyisa aseduze nabo uma kukhona abakhwabanisa izibonelelo zikahulumeni.
UNksz Sandy Godlwana, obhekele ezokukhangisa nokuxhumana eSassa, KwaZulu-Natal uthe kubalulekile ukuthi umphakathi usebenzisane nabo ukuze bakwazi ukuqeda ngenkohlakalo yokwebiwa kwamakhadi akwaSassa.
Abanolwazi ngabathatha amakhadi abanye akwaSassa nabakhwabanisa izibonelelo, kufanele babike lokhu ngokushayela inombolo yakwaSassa ethi: 080 070 1701.
UNksz Godlwana wenze lesi sicelo emuva kokuboshwa kwabantu abane abatholwe nenqwaba yamakhadi akwaSassa noR29 550.
UMnuz Sipho Siyaya
(48), ngoNksz Nompumelelo Memela (46), Siphokazi Siyayaya (18) noKhanyisile Memela (20) badedelwe yiMantshi yaseThekwini ngebheyili kaR3 000 umuntu ngamunye.
Icala labo lihlehliselwe uJuni 29 nonyaka.
Akusona isigameko sokuqala lesi.
Isolezwe like labika ngosomatekisi, uMnuz Sthembiso Gcaba osolwa ngokukhwabanisela abahola impesheni abawu-134 imali ewuR118 800.
Naye wadedelwa ngebheyili kaR5 000 yiNkantolo yeMantshi yaseThekwini.
Inkatha Freedom Party (IFP) icele iSassa ukuthi iqinise ezokuphepha emakhadini okuhola izibonelelo emuva kokutholakala kwamakhadi awu52 komunye umuzi eZululand.
UMnuz Les Govender, okhulumela i-IFP ezindabeni zokuthuthukiswa komphakathi esiShayamthetho saKwaZulu-Natal, uthe iSassa kufanele izinekele umphakathi izinhlelo zayo zokugwema ukuphindeka kabili kwamakhadi okuhola izibonelelo.
Amaphoyisa ayesesha komunye umuzi oseMondlo ngo-Ephreli athola amakhadi akwaSassa awu-52, awasebhange awu-19, aweEasy Pay awu-47 nomazisi abawu-130.
Umnikazi womuzi wayengekho ngesikhathi amaphoyisa esesha kodwa uphenyo luyaqhubeka ngalolu daba.
Khona lapho kwatholakala uR179 200, i-AK47 nezibhamu ezincane.
UGovender uthe bafuna iSassa ize nezinhlelo ezicacile zokulwa nobugebengu ngoba kuyacaca ukuthi izigebengu ezenza amakhadi akwaSassa, zisebenzisana nabasebenzi bakahulumeni.
UNksz Godlwana uthe kuningi abakwenzayo ukuqinisa ezokuphepha, abale kukho ukuthatha amanyela eminwe abasebenzi.
Uthe ukuthulwa kohlelo lwamanyela kuzosiza ukuqeda inkohlakalo nokukhwabanisa kwaSassa kodwa uhulumeni uyaludinga usizo lomphakathi.
“Uhulumeni uyadinga ukusizwa wumphakathi ukulwa nokukhwabanisa nenkohlakalo.
“Siyacela abantu basibikele uma benolwazi ngenkohlakalo ethinta izibonelelo zikahulumeni. Lukhona uhlelo lokuthi babike ngaphandle kokudalulwa amagama.