Kukhalwa ngomphakathi osika ucingo olubiyele isiqiwi
KUXWAYISWA umphakathi waKwaSomopho ngaphansi kwenkosi uMthembu ngengozi yokusika ucingo olubiyele isiqiwi iHluhluwe iMfolozi Park ngoba ukhala ngamathuba omsebenzi.
Kuthiwa ngoLwesibili umphakahi obubhikishela ukuqashwa yisiqiwi ngokugcwele uvele wasika ucingo endaweni eyikhilomitha.
Iziphathimandla zesiqiwi ziye kulo mphakathi ziyoxoxa nawo zathola nokuthi abantui baqhubekele phambili nokusika ucingo.
Isiqiwi sigcine izilwane ezibizwa ngeBig 5 okuyizilwane eziyingozi kakhulu uma zihlangana nemfuyo noma abantu.
Ibamba lesikhulu esiphezulu enhlanganweni Ezemvelo KZN Wildlife, uMnuz Ntsikelelo Dlulane, lithe bahlale besolwa ngokuthi isiqiwi sabo sinocingo olungekho esimeni esihle, izilwane ziyaziphumela.
“Sesithole imibiko eminingi yokuthi imiphakathi iyalusika ucingo, kwezinye izindawo lugcina ngokuthi lulaliswe phansi lungathathwa. Injongo akusikho ukuthi luntshontshwe ucingo kodwa ukucekela pansi esingakuqondi ukuthi isizathu sako yisiphi,” kusho uDlulane.
AbeZemvelo bathe abakwazi ukumane baqashe abantu kodwa kumele kuqale kulandelwe imigudu ethile futhi bathole imvume ehhovisi likandunankulu ukuze bagcwalise izikhala.
“Uma sezikhona izikhala, sizozikhangisa ukuze bonke abantu baseNingizimu Afrika bathole ithuba lokufaka izicelo zomsebenzi. Kuyasikhathaza ukuthi njengamanje sisesimeni lapho izilwane zingaphuma khona zihlasele imfuyo kulimale nabantu abasemakhaya akhele isiqiwi,” kusho uDlulane.
AbeZemvelo bathi bazolulungisa ucingo olucekelwe phansi okuthiwa olwesimanje futhi lumba eqolo.
Banxusa umphakathi ukuthi uhlale phansi nabo kuxoxwe uma kunezikhalo kungacekelwa phansi ingqalasizinda.
AbeZemvelo bathe sebelivulile icala lokucekelwa phansi kwempahla esiteshini samaphoyisa eNtambanana.