Kuvulwe isikhungo sobuchwepheshe elokishini
KUPHINDE kwavulwa esinye isikhungo sobucwepheshe esinamakhompyutha angaphezu kuka-30 kuMasipala weTheku, ngenhloso yokulekelela abafaka izicelo zomsebenzi nomphakathi wonke.
IMeya yeTheku, uMnuz Mxolisi Kaunda, nobuholi bomkhandlu nomphakathi bavule lesikhungo KwaDabela, eClermont, izolo.
Lesi sikhungo esibizwa ngeHuman Capital Centre of Excellence, silandela esinye esivulwe ngokusemthethweni eHammarsdale ngesonto eledlule.
UKaunda uthe sekuzophela ukuthi abantu bakule ndawo bahambe amabanga amade ngemali yokugcina beyofesa, befaka amaCV ePinetown.
Uthe konke sekuzokwenziwa eduze ngekhompyutha, kusheshe njengoba umuntu ngamunye enikwe ihora lokusebenzisa ikhompyutha.
“Kuzophela ukuthi abantu bakhiphe imali yokugcina beyofuna amathuba omsebenzi edolobheni. Amakhompyutha abekwe ngokuqhelelana, silandela imigomo elwa neCovid-19. Amathuba emisebenzi azofunwa lapha.
Wuyakwazi ukusesha yonke imisebenzi kahulumeni neyamabhizinisi azimele,” kusho uKaunda.
Uthe abantu bazosizakala ukuthi bakwazi ukuvula amabhizinisi. Kulesi sikhungo bazoza bezohlwaya ulwazi oluzobalekelela ukuthi baqhubeka nebhizinisi namathuba, okungaba ngamathenda noma asemkhakheni ozimele wamabhizinsi.
“Sikhipha usizi emphakathini. Luzophela usizi lokukhishwa kwemali yokugcina kuthiwe hamba uyofuna umsebenzi, bese wufika phambili ungawutholi umsebenzi. Abantu bazokwazi ukufaka izicelo zomsebenzi bese belindela ukubizelwa kwinhlolokhono,” kusho uKaunda.
ITheku belibeke eceleni uR4.5 million onyakeni wezimali odlule, wokwakha izikhungo ezifuze lesi.
Onyakeni wezimali u-2021, umkhandlu uzosebenzisa uR1.9 million wakha ezinye izikhungo ezine.