IChiefs izoshintsha isikimu koweDiski Challenge
UZOSHINTSHA ukwenza umqeqeshi weKaizer Chiefs kwiDStv Diski Challenge, u-Arthur Zwane, uma sebebhekene neTshakhuma Tsha Madzivhandila ngempelasonto.
Umdlalo ungeSonto ngo-9.30 ekuseni eLucas Moripe Stadium, ePitoli.
UZwane uveze ukuthi kulo mdlalo uzoshaya ngabadlali abangajwayele ukuthola isikimu.
Ukhuluma kanjena nje, ngempelasonto iqembu lakhe libe ngelokuqala ukuzibekisela indawo emidlalweni eyandulela owamanqamu kwiDiski Challenge Rewired.
Lokhu abafana beChiefs bakwenze ngemuva kokuxebula ngo 3-1 iSwallows FC.
KwiGroup B, iChiefs ihlezi esicongweni se-log yeDiski ngamaphuzu angu-15 emidlalweni eyisithupha. Amaqembu asebanga indawo yesibili yi-Orlando Pirates neMamelodi Sundwons nabo abazobhekana ngeSonto ngo-12pm, khona eLucas Moripe.
UZwane uthe ujabule kakhulu ngokuthi iqembu lakhe likwazile ukuzibekisela indawo emidlalweni eyandulela owamanqamu.
“Abadlali bami kubafanele lokhu. Basebenze ngokukhulu ukuzikhandla ukuze babe kule ndawo abakuyo njengamanje.
“Bathembisa ukuthi bafuna ukufinyelela emdlalweni wamanqamu, ukuze banqobele iqembu, nabo uqobo lwabo ngokunjalo nabalandeli.
“Manje ngeke sisabheka emuva. Sihamba ngomgudu ofanele futhi sesiwutholile nomgqigqo wethu. Nokuzethemba kukhulu kakhulu manje,” usho kanje uZwane, obuye abe ngumsizi kaGavin Hunt eqenjini elikhulu lamaKhosi.
Le nkakha yeChiefs, iphawule ngomdlalo wabo wokugcina wamaqoqo, abazowudlala neTshakuma. Ithe: “Kulo mdlalo wethu wokugcina neTTM sizonikeza abafana abancane ithuba lokuthi badlale, okuyinto ezobasiza ekutheni bathole isipiliyoni. Lokhu kuyingxenye yethu yokulungisela isizini ezayo.
“Kodwa-ke uma sesidlala emdlalweni owandulela owamanqamu bazobuya bonke abadlali abajwayele ukudlala. Sizoba neqembu eliqinile uma sesibhekene nanoma ngubani kowandulela owamanqamu.”
Imidlalo yeDStv Diski Challenge yangempelasonto:
NgoMgqibelo - Ngo-10am: AmaZulu FC v Cape Town City (King Zwelithini Stadium); Maritzburg United v TS Galaxy (Harry Gwala Stadium); Stellenbosch FC v Chippa United (Idas Valley); Lamontville Golden Arrows v Supersport United (Sugar Ray Xulu Stadium); Bloemfontein Celtic v Baroka FC (Dr Petrus Molemela Stadium); Swallows FC v Black Leopards (Dobsonville Stadium).
NgeSonto - Ngo-9:30am: Tshakuma Tsha Madzivhandila v Kaizer Chiefs (Lucas Moripe Stadium).
Ngo-12pm: Mamelodi Sundowns v Orlando Pirates (Lucas Moripe Stadium).