Ayancipha amathuba eTop 8 kwiChiefs
AYA ngokushabalala amathuba eKaizer Chiefs okusonga iligi ebalwa namaqembu ayisishiyagalombili aphezulu kwiDStv Premiership.
Iphinde yabhacaza izolo ibambana neSwallows eFNB Stadium. IZinyoni zibone imbobo yepali kuqala ngegoli likaKagiso Malinga elingene ngomzuzu wesishiyagalombili. EleChiefs lingqofelwe enethini ngekhanda wuLeornardo Costro ngoka-15. Uqedele ibhola likaHappy Mashiane elishaye ipali.
IziMpofana zizoqhubeka nokuhlala kweyeshumi ngamaphuzu awu-30, emidlalweni ewu-27. Nakuba bebengeke bangene kwi-Top 8 kodwa ukuthola amaphuzu amathathu bekuzobehlisela umthwalo. Ukunqoba kwiZinyoni bekuzobuyisa nokuzethemba kubadlali beChiefs ngaphambi kowe-quarterfinal yeChampions League, ezobhekana kuwo neSimba yaseTanzania ngempelasonto.
Esiwombeni sokuqala igoli leSwallows liqhamuke ngebhola eligotshwe kwesobunxele nguSifiso Hlanti, lahlala ezinyaweni zikaMalinga ongacucuzanga. Igoli leChiefs ligotshwe ngobunono nguSiyabonga Ngezana elihlale cababa ekhanda likaMashiane.
Siqala esesibili, uReeve Frosler, obephuma ebhentshini, ugobe ngakwesokudla ibhola elihle elihlale ekhanda likaCastro ephambi kwezinti zikaVirgin Vries kodwa wadlala ukucucuza. AmaKhosi ahluleke ancama ngisho esefake uDumsani Zuma, Samir Nurkovic ocishe walibeka phakathi ngoka-82, Nkosingiphile Ngcobo noLazarous Kambole oshaye intululwane ephume phezu kwamapali ngoka-87.
Bekungokwesine ezikaHunt zihluleka ukuqoqa amaphuzu aphelele.
Uma AmaKhosi ezimisele ngokungena kwi-Top 8, kuyawaphoqa ukuwaqoqa woyisishiyagalolunye amaphuzu awasalele.
Agcina ngesizini ka-2018/19 ukuhluleka ukungena kwi-Top 8.
IZinyoni zizoqhuqhubeka nokuhlala kweyesihlanu ngamaphuzu awu-41, emidlalweni ewu-26. Bekuwumdlalo wesi-17 zidlala ngokulingana.
Imiphumela yeDStv Premiership Chippa United 0-0 Black Leopards; Maritzburg United 3-2 Lamontville Golden Arrows; Bloemfontein Celtic 0-0 Cape Town City; SuperSport United 1-0 Tshakhuma; Kaizer Chiefs 1-1 Swallows.