IBaroka isibheke ukuqeda kwiTop 8
IBAROKA FC seyizolwela ukuqeda emaqenjini ayisishiyagalombili aphezulu kwiDStv Premiership.
Lokhu kuzethemba komqeqeshi weBaroka, uThoka Matsemela, kugqame ngemuva kokuqeda umgqigqo waMaZulu FC abeseqhube imidlalo ewu-16 engayazi induku kwiligi.
IBakgaga ibuyisele Usuthu kwamhlaba ilwehlula ngo-1-0 wegoli likaRichard Mbulu ngoLwesibili eKing Zwelithini Stadium, eMlaza.
“Bekuwumdlalo onzima kodwa ngincoma abafana, basebenze ngokuzikhandla. Ngicabanga ukuthi siwahlelele kahle
AmaZulu. Iqhinga lethu lokubavimba bangakwazi ukudlala ibhola emuva lisebenze kahle.
“Ngiyabajabulela abadlali ngendlela abadlale ngayo. Ngibonga nethimba labaqeqeshi. Siwajabulela kakhulu la maphuzu amathathu,” kusho uMatsemela.
Amaphuzu amathathu anyusele ezikaMatsemela endaweni yesishiyagalolunye kwi-log (ngaphambi kwemidlalo yayizolo). IBaroka isiqoqe amaphuzu awu-32 emidlalweni ewu27.
Emdlalweni wabo olandelayo bazobhekana nomkhaya, iTshakhuma Tsha Madzivhandila, ngoLwesibili ePeter Mokaba Stadium ngo-3 ntambama.
“ITshakhuma ngomunye umdlalo onzima. Kumele siqinisekise ukuthi kukhona esikutholayo, ikakhulukazi amaphuzu amathathu ukuze sizosondela kwiTop 8.
“Ukushaya iqembu elisefomini njengaMaZulu, ebeseliqhube imidlalo ewu-16 lingashaywa kodwa sakwazi ukulibamba, kuyasikhuthaza.”
Eminye imidlalo esele yeBaroka kukhona owe-Orlando Pirates ekhaya bese ivala isizini neSwallows ekuhambeni ngoJuni 5.
Amanye amaqembu aselwela ukuqeda kwiTop 8 ehambisana nokudlala kwiMTN 8 ngesizini ezayo kukhona iKaizer Chiefs, TS
Galaxy, Cape Town City neBloemfontein Celtic.