U-Broos akalidingi iphini eliyivukana
INHLANGANO eyengamele ibhola eNingizimu Afrika, iSouth African Football Association (Safa), izoziqokela iphini lakuleli elizosebenza nomqeqeshi omusha weBafana Bafana, uHugo Broos, osephumele obala ngokuthi akalidingi ivukana.
U-Broos waseBelgium utheleke kuleli ngasekuqaleni kwesonto. Esithangamini nabezindaba izolo, usheshe wakucacisa ukuthi usazobuyela ekhaya ukuyojovela okwesibili iCovid-19 ngaphambi kokuzoqala ngokugcwele umsebenzi wakhe.
NgokukaBroos, ufuna amaphini amabili, elaseBelgium nelaseMzansi elizomsiza ikakhulukazi ngabadlali bakuleli. ElaseBelgium kuzoba nguCedomir Javenski (59) ambize ngomngani wakhe oseqeqeshe amaqembu amaningi ahlukene okukhona kuwona iClub Brugge edlalelwe nguPercy Tau neqembu lesizwe laseMacedonia. Njengamanje wenza uqeqesha i-Olympiakos Nicosia eCyprus.
Isikhulu esiphezulu seSafa, uTebogo Motlanthe, sithe ikomiti labo lisacubungula kahle ukuze lizothola iphini elifanele likaBroos.
"Ikomiti linezinto zalo elizibhekayo. Kufanele kube ngumuntu ozothasisela ngolwazi. Kufanele kube ngumqeqeshi onesipiliyoni. Ngakho (uBroos) uzoqhubeka nokuxhumana nekomiti, bakhulume nalabo okuzoqokwa kubona ngezinto ezibhekwayo ukuze benze isiqiniseko sokuthi bathola umuntu onesipiliyoni futhi onakho kokubili okudingwa ngumqeshi nokudingwa yikomiti kwenzelwe ikusasa laleli zwe," kusho uMotlanthe.
U-Broos ucele abantu baseMzansi ukuba bakulindele ukuthi kungenzeka iBafana ingangeni koweNdebe yoMhlaba ozoba seQatar phezu kokuba lokhu kungenye yemigomo aqashelwe phezu kwayo. Uvumile ukuthi akakanikezwa iphini laseMzansi.
"Okwamanje angikwazi ukusho ukuthi kuzoba ngubani iphini lami lalapha. Iphini lami kuzoba ngumqeqeshi obaluleke kakhulu, akuyena umuntu ozoqoqa amakhoni. Kuzofanele basebenze. Bangabaqeqeshi. Ngakho kubalulekile ukuthi bangiqokele umuntu ofanele. Uma sebeliqokile iphini ngizoba nomhlangano nalo. Noma ngabe ngubani ozoqokwa, kufanele ayazi indlela esizosebenza ngayo naye.
Uma engavumelani nayo, kulungile, Kufanele ngibheke omunye," kusho uBroos.
"Sidinga ukuba neqembu.
Uma iphini lami lingathembekile, kusho ukuthi lingaphikisana nezinqumo esizenzayo. Lapho-ke sinenkinga. Yikho sizohlangana