Baqokiwe abazophatha uhlelo kumaSaftas
UVUNYWE yizinto uDineo Langa njengoba emenyezelwe njengomunye wabazophatha uhlelo emcimbini wokuklomelisa abenza kahle kwezethelevishini, amaSouth African Film and Television Awards (Saftas), ngoMgqibelo.
Selokhu kuqale unyaka uDineo, oke walingisa indawo kaKea kwiThe Queen, uthole ithuba lokudlala indawo ephambili kwiThe Estate esanda kuqala kwiS3 futhi uzokwethula nohlelo lomculo kuSABC 2, iStand South Africa.
KumaSaftas, okuzoba ngaka15 kulo nyaka, uzobe ebambisene nosomahlaya uMpho Popps nomethuli wezinhlelo uGraeme Richards.
Umcimbi uzobe usakazwa bukhoma kwiS3 nakuMzansi Magic ngoMgqibelo kusuka ku-6.30 ntambama.
Ngaphambi kokuqala komcimbi, osaziwayo abobe bengena kukhaphethi obomvu, bazokhuluma nomsakazi weMetro FM, uLerato Kganyago, noLasizwe Dambuza, ngemisiko abazobe beyidlubhile.
Le miklomelo idonsa izinsuku ezimbili njengoba eminye izomenyezelwa ngoLwesihlanu. Izobe isakazwa bukhoma kwiYouTube kusuka ngo-7 ebusuku futhi uhlelo lwakhona luzobe luphethwe nguTracey Lange noLesego "Coconut Kelz" Tlhabi.
AmaSaftas asematheni kulezi zinsuku emuva kokuhoxiswa kukaKatlego Maboe ohlwini lwabaqokwe emunxeni weBest TV Presenter. Abagqugquzeli bathe abehluleli babuye basicubungula kabusha isinqumo sabo sokumqoka.
Lokhu akwehlanga kahle kwabanye okubalwa kubo no-Anele Mdoda othe: "Ngenxa nje yokuthi waphinga!!! Kahleni bafowethu, wozani nizolanda wonke amaSaftas ethu."
UKatlego waba sematheni nyakenye emuva kwezinsolo zokuthi wajolela isithandwa sakhe futhi kwaba nezinsolo zokuhlu-kumeza.
Umunxa abeqokwe kuwo uvotelwa ngumphakathi futhi sekusele abayisikhombisa.
Omunye ovotelwayo ngoweMost Popular TV Soap/Telenovela. Kuyona yomibili le minxa ukuvota kuzovalwa ngo-9 ebusuku ngoLwesithathu kanti ukuvota ushayela u-*120*320320#.
Up