Inkantolo izofuna izizathu zokuhoxa kwabameli
ABAMELI bowayengumengameli wakuleli kumele bachazele inkantolo enkulu yaseMgungundlovu namuhla ukuthi kungani bethathe isinqumo sokuthi bahoxe ekumeleni uZuma ecaleni lenkohlakalo abhekene nalo.
Ummeli uMnuz Mpumelelo Zikalala ekhuluma neNewzroom Afrika izolo, uthe inkantolo izodinga ukwazi izizathu zokuthi kungani abameli benqume ukuhoxa.
Uma kuyizizathu ezithinta imali, inkantolo izofuna ukwazi ukuthi ngabe lokhu kwenzeke ngaphambi kokuthi beze enkantolo lapho kwavunyelwana khona ukuthi konke sekumi ngomumo ngecala noma emuva kwalokho.
Uthe uma kuwukuthi lesi sinqumo sithathwe emuva kokuthi abameli nenkantolo bavumelana ngokuthi konke sekumi ngomumo inkantolo ingakuphikisa ukuhoxa kwabameli ngenxa yokuthi umthetho iLegal Practitioners Act nemigomo yokuziphatha kwabameli ayikuvumeli ukuthi kube khona okuzophazamisa ukushesha kokuqulwa kwecala, inkantolo ingabanxusa abameli ukuthi baqhubeke uma isizathu kungesemali kuphela.
Uthe kodwa uma kuwukuthi kukhona esinye isizathu okungaba ngesokuthi kababoni ngaso linye nabamumele okungenza ukuthi bangabe besakwazi ukumumela ngendlela efanele, inkantolo izobe isibuza uZuma ukuthi unabo yini abanye abameli abangamumela.
UZikalala uthe kubalulekile ukuthi inkantolo ithole izizathu zokuhoxa kwabameli isebenzisa uhlelo lokuthola izizathu kummeli ngaphansi kukaSection 342A weCriminal Procedure Act, ngoba ibisibeke isikhathi eside ukuze kuqale ukuqulwa kwaleli cala.
Inkantolo ifuna ukwazi ukuthi izizathu ziyabambeka yini ngoba ibinganika ijaji elizokwengamela icala elinye icala ukuthi ilenze ngalesi sikhathi noma inike abameli esinye isikhathi sokuthi ixazulule inkinga ekhona phakathi kwabo nabamumele.