Kugwetshwe umshushisi ngecala lenkohlakalo

UGWETSHWE iminyaka eyisishiyagalombili obengumshushisi ngamacala enkohlakalo, ukukhwabanisa nokuphazamisa ukusebenza kwengalo yomthetho.

INkantolo yesiFunda eCamperdown igwebe uZanele Molefe (42) okuthiwa wafuna ukufumbathiswa uR1000 khona ezoqeda icala.

I-National Prosecuting Authority (NPA) imkhombe indlela ngenxa yalesi sehlakalo okuthiwa senzeka ngoMeyi 2015 ngenkathi engumshushisi eNkantolo yeMantshi eMooi River.

I-NPA KwaZulu-Natal ithi kunowesilisa, uMnuz Philani Hlela, owashayisa umnyango oyingilazi wesitolo.

Kuthiwa umnikazi wesitolo, uMnuz Donovan Carter, wavulela uHlela icala lokucekela phansi impahla emaphoyiseni, elabe selinikwa uMolefe.

I-NPA ithi uMolefe wafuna uR1000 kuHlela khona ezoqeda icala ayebhekene nalo, nebala wawukhokha.

Kuthiwa uMolefe watshela uCarter ukuthi abukho ubufakazi obenele ngecala alivulile nokwaholela ekutheni agcine eseya kuHlela baxoxisana ngenkokhelo.

UNkk Natasha Kara, ongumkhulumeli weNPA esifundazweni, uthe lawa madoda axoxa avumelana ngokuthi uHlela uzokhokhela uCarter uR10 000.

“UHlela wacela uCarter ukuthi amnikeze isonto khona ezohlanganisa imali. Ngemva kwamasonto amathathu uCarter wabuza uHlela ukuthi kungani engamkhokheli uR10 000 abavumelana ngawo, waphendula ngokuthi wayinika uMolefe,” kusho uNkk Kara.

Kuthiwa uCarter waya ngqo ehhovisi likaMolefe eyofuna imali, uMolefe wamtshela ukuthi useyisebenzisile kodwa kwavunyelwana ngokuthi uzoyikhokha ngezikhawu uR2 500, wagcina ekwenzile.

Kuthiwa uMolefe wayekade ethathe imali kuHlela ngaphandle kwenkantolo ifakwe kuplastiki ethi uzoyidlulisela kuCarter.

“Into okwakumele yenziwe wuMolefe wukuthi asebenzise uhlelo lwenkantolo lokukhokhelana kunokuthi ayamukele ngokwakhe le mali,” kusho uNkk Kara.

UMbuso usebenzise ubufakazi obethulwe enkantolo wuHlela noCarter ugojela uMolefe.

Samukelwe nangumqondisi weNPA KwaZulu-Natal, u-Advocate Elaine Zungu, isigwebo esinikwe uMolefe.

“Leli cala liwubufakazi bokuthi iNPA izimisele ukulwa nezenzo zenkohlakalo kusukela kithina kulolu phiko,’ kusho u-Adv Zungu.