Kuminze iphoyisa lidoba olwandle
KUMINZE iphoyisa likaMasipala weTheku ngesikhathi beyodoba olwandle iWestbrook ngasoThongathi izolo ekuseni.
Kuthiwa u-Inspector Anthony Pattison (54) ubezikhiphele olwandle nomngani wakhe beyodoba ngesikhathi kwenzeka lesi sehlo.
Okhulumela amaphoyisa omkhandlu, uSenior Superintendent Parboo Sewpersad uthe isehlakalo senzeke ngemva kuka-7 ekuseni.
Ulandise wathi umufi ubesophikweni lwebhendi kamasipala eviliyela uma kunemicimbi nemingcwabo obekuthi uma engekho emsebenzini enze izinto eziningi zokuzijabulisa okubalwa nakho ukudoba.
“Uye nomngani wakhe olwandle kanti uzobona isikhuphashe (crayfish) edoba wasigxumela. Uhlangabezane nobunzima ngenkathi etshuza, wayesephela emehlweni,” kusho uSewpersad.
Uqhube wathi umngani kaPattison uzamile ukumfuna emanzini wangamthola waphuma wahlaba umkhosi.
Kuthiwa ubuyelile esehamba nabatakuli namaphoyisa atshuzayo.
“Bamtholile bamkhiphela ngaphandle kwamanzi. Amaphoyisa nabosizo lokuqala bazame konke okusemandleni abo ukuhlenga impilo yakhe kwanhlanga zimuka nomoya. Uhlonzwe njengoshonele endaweni yesehlo,” kusho uSewpersad.
Udlulise amazwi enduduzo emndenini, kubangani nasembuthweni wamaphoyisa kamasipala wathi ibuhlungu into ebehlele. Okhulumela amaphoyisa KwaZulu-Natal uColonel Thembeka Mbele, uthe kuvulwe idokodo ngokufa komuntu eliphenywayo mayelana nalesi sehlakalo. Kwesinye isehlakalo, kulimale kabi iphoyisa lomgwaqo elishayiswe yimoto emgwaqweni onguthelawayeka uN2 ngaseProspecton eThekwini izolo ekuseni.
Abezimo eziphuthumayo kwaNetcare 911 babizelwe kule ndawo eseduze nesikhumulo sezindiza esidala, bafica iphoyisa lilele phansi. Kuphazamiseke ukuhamba kwezimoto njengoba kudingeke ukuba ivalwe isikhashana imizila kuhlengwa iphoyisa. Okhulumela abakwaNetcare 911, uShawn Herbst uthe lilimale kabi iphoyisa, kwadingeka kubizwe indiza enophephela emhlane ephuthumise iphoyisa esibhedlela. Uveze nokuthi oshayise iphoyisa akabalekanga, uthathwe amaphoyisa.