Uboshelwe ukweba ibhokisi
ZIMKHALELE owenkampani kamasingcwabisane wasoLundi, osolwa ngokutholakala nebhokisi elintshontshwe komunye umasingcwabisane.
Owesilisa ogama lakhe elingeke lidalulwe kuze kube uvela enkantolo, kuthiwa uboshwe izolo ngecala lokutholakala nebhokisi elebiwe.
Isolezwe lithole ngomthombo walo ukuthi kugqekeziwe kwamasingcwabisane iCelani’s Funeral oLundi, ngoLwesihlanu kwathathwa ibhokisi lokungcwaba.
Kuvulwe icala, uphenyo lwamaphoyisa lwabaholela komunye umasingcwabisane okutholwe kuye leli bhokisi selilungele ukuyongcwaba komunye umndeni.
Isolezwe lithole ukuthi ngaphambi kokuba kugqekezwe, umsolwa ufike eCelani, efuna ukuthenga ibhokisi. Kuthiwa abazange bavumelane ngenani lebhokisi, wabe esehamba umsolwa. Ngakusasa kwasolisa uma befika sekugqekeziwe, kwathathwa leli bhokisi, nezinye izinto zokungcwaba okubalwa iziphambano nomata. Amanye amabhokisi awathathwanga.
“Kuvele kwacaca ukuthi kungani kuthathwe ibhokisi abevele efuna ukulithenga. Kuyiwe kulawa makhaza kamsolwa latholakala ibhokisi endaweni yakhe yokusebenza,” kusho umsolwa osondelene nodaba ocele ukungadalulwa.
Omunye umthombo uveze ukuthi umndeni obunomasingcwabisane kuleli bhizinisi likamsolwa, ubucele ukwenzelwa umsebenzi, ufuna lolu hlobo lwebhokisi. Kuthiwa lo mndeni uze wagcina usulithole kwenye indawo, sekuboshwa umnikazi wamakhaza.
Okhulumela amaphoyisa KwaZulu-Natal uColonel Thembeka Mbhele usiqinisekisile isigameko.
“Likhona lelo cala, okwamanje kuvulwe icala lokutholakala nezinto zokwebiwa. Kugqekezwe emahhovisi kamasingcwabisane kwathathwa ibhokisi, bavula icala lokugqekeza ngoLwesihlanu. Litholwe kwenye indawo ibhokisi kwaboshwa umsolwa. Uzovela kusasa (namhlanje) enkantolo yaseMahlabathini,” kusho uCol. Mbele.
Isolezwe izolo lizamile ukushayela ucingo umnikazi kamasingcwabisane okuthathwe kuwo ibhokisi, ucingo lwakhe belungangeni. Eminye imizamo yokuthola ukuphawula kwabo ayizange iphumelele kwaze kwashaya isikhathi sokushicilela.