‘Maningi amathuba ezigaba eziphezulu zomvalelandlini’
UKWENYUSELWA kwezwe ezigabeni zomvalelandlini eziphezulu yinto engeke igwemeke.
UNgqongqoshe wezeMpilo, uDkt Zweli Mkhize, ucashunwe kweminye imithombo yezindaba ethi maningi amathuba okuthi lokhu kwenzeke njengoba zilokhu zinyuka izibalo zabahaqwa yigciwane.
Ngeledlule izibalo zabahaqwe yigciwane zike zaba ngu-3000 ngosuku.
Uqhube wathi umkhandlu wongqongqoshe ababhekelele iCorona, iNational Command
Council (NCC) oholwa nguNgqongqoshe wezekuBusa ngokuBambisana uDkt
Nkosazana Dlamini Zuma nezinhlaka ezithintekayo, bazoba nomhlangano babonisane ngesinyathelo okumele sithathwe ukuze kunqandwe ukusabalala kweCovid-19.
"Uma izibalo zikhuphuka izigaba zomvalelandlini zizokwenyuswa, uma zehla kuzoxegiswa," kusho uMkhize.
Seziqalile neziphakamiso zokuthi uhulumeni ubheke ukuthi ngeke yini kumiswe ukudayiswa kotshwala nogwayi ngoba kunenkolelo yokuthi kunomthelela ekutheni abantu bathelelane ngegciwane.
Abemboni yabadayisa utshwala kuleli, iSouth African Liquor Brandowners Association (Salba) neVinpro, bathe uma uhulumeni enganquma ukumisa ukudayiswa kotshwala futhi uzobe ebeka engcupheni imisebenzi engu-200 yabasebenza kule mboni.
UMnuz Sibani Mngadi, weSalba, uthe uhulumeni akakaze aziveze izizathu ezibambekayo zokuthi kungani evala ukuthi utshwala budayiswe, ababuthengayo babuphuzele emakhaya.
Ngeledlule iKhabhinethi yelule isikhathi sokuthi izwe lithathwe njengelibhekene nenhlekelele nokuzophela ngoJuni 15.
UNdunankulu waseGauteng, uMnuz David Makhura, umemezele ukuthi sesiqalile isivunguvungu sesithathu kulesi sifundazwe.
I-National Institute for Communicable Diseases (NICD) ngeledlule imemezele ukuthi iFree
State ingesinye sezifundazwe isivunguvungu sesithathu esesifikile kuyo nakuba izinombolo zabahaqwa yiCorona zingakafinyeleli esibalweni esibekiwe esisho lokhu kodwa ukwenyuka kakhulu kwezibalo zakhona sekukhomba khona.
Izibalo zakamuva zabahaqwe yiCovid-19, ezikhishwe wuMnyango wezeMpilo kuleli ngoMgqibelo, zikhomba ukuthi bangu-2 750 abantu abahaqwe yigciwane emahoreni angu-24 okuholele ukuthi isibalo sabahaqiwe senyukele ku-1 611 143. Ababulewe yizifo ezisondelele kulesi sifo ngesikhathi esifanayo bangu-59 okuholele ekutheni isibalo sabahaqwe yigciwane senyukele ku-55 183, kubo abangu-20 bashone eGauteng, abangu-18 abaseNorthern Cape, abayisishiyagalombili abaKwaZulu-Natal, abayisithupha abaseWestern
Cape, abahlanu abaseFree State, eMpumalanga kushone ababili.