I-ANC izobhunga ngecala elifakwe nguMagashule
UBUHOLI obuphezulu be-ANC buzohlangana namhlanje, buzobhunga ngecala elifakwe enkantolo nguNobhala jikelele wenhlangano osamisiwe, uMnuz Ace Magashule.
UMagashule ufake amaphepha eNkantolo eNkulu eGoli, lapho ephonsa inselelo ngesinqumo sokumiswa kwakhe njengonobhala jikelele wenhlangano. Wamiswa emva kokuthi kuphele umnqamulajuqu wezinsuku ezingu-30, ayezinikeziwe nabanye abaholi ababhekene namacala, ukuba bashenxe ezikhundleni.
Ubhekene necala lenkohlakalo ngethenda kaR250 million yokulungiswa kophahla lwezindlu ezifulelwe ngetsheboya, eyakhishwa ngesikhathi esengundunankulu eFree State.
Namhlanje ubuholi obuphezulu benhlangano okunguMengameli Cyril Ramaphosa, iPhini likamengameli uMnuz David Mabuza, uSihlalo kazwelonke uMnuz Gwede Mantashe, iPhini likanobhala jikelele uNkk Jessie Duarte noMgcinimafa uMnuz Paul Mashatile, buzoba nomhlangano lapho buzobhunga ngodaba.
Okhulumela i-ANC, uMnuz Pule Mabe, ukuqinisekisile ukuthi kuzoba nomhlangano.
“I-ANC iwabonile amaphepha asenkantolo afakwe ngunobhala jikelele osamisiwe, uMnuz Ace Magashule. I-ANC izokusho ngoMsombuluko (namhlanje) emva komhlangano wezikhulu eziphezulu ukuthi izoya kanjani phambili. Angifuni ukufaka umbono wami kulokhu.”
UMagashule ufuna inkantolo ichithe ukumiswa kwakhe njengonobhala jikelele wenhlangano. Emaphepheni asenkantolo, uMagashule uthi umgomo we-ANC wokuthi abaholi ababhekene namacala kufanele bashenxe ezikhundleni, awukho emthethweni.
Ufuna nokuthi inkantolo ichithe umyalelo we-ANC wokuthi kufanele axolise ngokubhala incwadi emisa uRamaphosa emsebenzini. Ngesonto eledlule isigungu esiphezulu se-ANC samnqumela ugwayi katiki uMagashule, ukuba axolise ngokubhala le ncwadi yokumisa uRamaphosa emsebenzini sathi wayengenalo igunya lokuyibhala.
Ubekade eyalelwe ukuba axolise lungakapheli usuku lwangoLwesithathu ngesonto eledlule, kepha wawushaya indiva umyalelo. Le ncwadi uMagashule wayibhala emva kokuba kuputshuke incwadi emisa yena emsebenzini.
Ngokwamaphepha asenkantolo, uMagashule ufuna udaba lulalelwe ekuqaleni kukaJuni. Kula maphepha uthi udaba luyaphuthuma, uxwayisa ngokuthi kungaba nodlame uma lungase lungalalelwa ngokushesha.
Abalandeli bakhe sebeqalile ukubamba imihlangano bebhunga ngokuwuphonsela inselelo lo mthetho wokuthi abaholi ababhekene namacala bashenxe ezikhundleni. NgoMgqibelo bebehlangene esifundazweni iFree State, lapho bezwakalise ukungahambisani nomthetho.