Kubuye isithunzi bakhelwa amathoyilethi ashaywayo
BABUYISELWE isithunzi abantu baselokishini, Osizweni, eNewcastle, ngesikhathi benikwa amathoyilethi amasha ashaywayo, kwadilizwa amadala ayakhiwe wuhulumeni wangesikhathi sobandlululo.
Amathoyilethi awu-260 adluliselwe emphakathini ngokusemthethweni ngoLwesihlanu wuNgqongqoshe wezokuBusa ngokuBambisana neziNdaba zoMdabu KwaZuluNatal, uMnuz Sipho Hlomuka, neMeya yaseNewcastle, uDkt Ntuthuko Mahlaba.
Badlulele nasesikhungweni samanzi nenyubathi esinwetshwayo eMadadeni beyohlola ibanga eselihanjiwe sithuthukiswa. Luzodla uR69 million selulonke lolu hlelo.
UMahlaba uthe babuyisele isithunzi kubantu ngezindlu zangasese ababakhele zona.
Uthe ukunwetshwa kwedamu kuzolekelela kwandise umthamo wamanzi ahlinzekwa imiphakathi eyakhele iNewcastle.
“Izinkinga zokuphehlwa kwamanzi sezizoya ngokuba ncane. Sibone ukuthi sizinikele kakhulu khona bezoba baningi abantu abazothola amanzi,” kusho uMahlaba.
UMahlaba uthe ukunwetshwa kwedamu kuzohlangabezana nezinhlelo abanazo zentuthuko ngoba ziningi izindlu abasazozakhela abantu.
UHlomuka ubonge ubuholi boMkhandlu waseNewscastle ngezinhlelo onazo zentuthuko, ikakhulukazi lezo ezithinta ukuthuthukiswa kwengqalasizinda. Uthe kuzodaleka imisebenzi, kucijwe abantu ngamakhono kunwetshwa lesi siphehlimanzi. Uthe uhlelo luzoqinisekisa ukuthi abantu bayawathola amanzi ngendlela efanele.
“Kuzoba khona intuthuko, kwakhiwe izindlu ezintsha okuzodinga ukuthi kube nohlelo oluqondile lokuthuthwa kwenyubathi. Ngakho awukwazi ukuqala phansi ulungise ingqalasizinda yenyubathi ngesikhathi sekuhlala abantu yingakho kwenziwa manje,” kusho uHlomuka.
Uthe bazoqhubeka basebenzisane nomasipala kuthi labo abanika uxhaso lwemali balandelele ukuthi isetshenziswa ngendlela efanele futhi imisebenzi iyenziwa.
“Kuyaye kwenzeke kuthiwe omasipala badla imali uma benikeziwe kodwa lapha (eNewcastle) siyabona ukuthi yenzani esibanikeze yona,” kusho uHlomuka.