Izingxoxo zamaholo mazingaphazamisi e-Eskom
IZINHLELO zokuphendula i-Eskom nokushintsha imithetho ephatha ukuphehlwa kukagesi zibalulekile kakhulu ezinhlelweni zokuguqula izikhungo okwathenjiswa wuMengameli Cyril Ramaphosa.
Njengoba i-Eskom inezingxoxo zamaholo nabasebenzi, uhlelo lwezinguquko lungacishe luphazamiseke. I-Eskom kumele ihlukaniswe ibe yizinkampani ezisemthethweni ezintathu ezizoba ngaphansi kwebhodi elikhulu le-Eskom Holdings.
Izingxoxo ngamaholo zaphambilini zaluphazamisa lolu hlelo njengoba kwakunezinsolo zokuthi ezinye zezisebenzi zakwa-Eskom zathikameza ukusebenza kwe-Eskom, okwanciphisa umfutho wabaphathi ngohlelo lwezinguquko. Akufanele izisebenzi ze-Eskom zivunyelwe ukuluphazamisa futhi uhlelo ngokusabisa ngokuphazamisa ukuphehlwa kukagesi, okungaholela ekunqanyulweni kukagesi okuzochaphazela ezomnotho nezepolitiki.
Ziqala izingxoxo izisebenzi ziphakamise ukuthi isilinganiso sokukhuphula amaholo sibe ngu15%. Lesi siphakamiso sifike i-Eskom ibhekene nenkinga yokungangeni kahle kwemali ngenxa yesimo seCovid-19 esibange ukwehla kwezinga lokuthengwa kukagesi.
Yize lehlile inani likagesi othengiswayo, iyehluleka i-Eskom ukuphehla ugesi owanele. Noma izinyunyana zingagcina zehlisa ngohhafu iziphakamiso zazo, isimo semali e-Eskom asivumi ukuthi ingakwazi ukukhokha leyo mali kubasebenzi njengoba izindleko ezingaguquki zilokhu zikhuphuka futhi i-Eskom inesikweletu esikhulu sikaR450 billion esidinga ukuhleshulwa ngoR29bn ngonyaka.
Ukuze i-Eskom ikwazi ukuzimela, ihlosa ukuba nenzuzo ka-35%.
Iziphakamiso zabasebenzi ziphinde zingahambelani nesimo somnotho osadonsa kanzima kulesi sikhathi seCovid-19. Amabhizinisi amaningi ehlise amaholo, amanye achithe izisebenzi kwaba khona athinteke kabi kakhulu agcine esevala.
Ngokombiko weStats SA bangu-500 000 abalahlekelwe yimisebenzi phakathi kukaDisemba 2019 noDisemba 2020.
Uma le nkampani kahulumeni ecwilayo inganyusa amaholo ngezinga eliphezulu, kungaba yisenzo esibonakala engathi i-Eskom ayinendaba nesimo somnotho.
Kumele uhulumeni aseke ibhodi nabaphathi bayo i-Eskom kulezi zingxoxo zamaholo esilindele ukuthi zishube. Uma kuhlolisiswa kahle ukuguqulwa kwe-Eskom, kuyacaca ukuthi kugxile endabeni yabasebenzi okuyinto efanele.
Phakathi konyaka odlule, umphathi omkhulu we-Eskom, u-Andre de
Ruyter, echazela amalungu eBusiness Leadership SA wathi ukuguqula i-Eskom kuxhumene kakhulu nabasebenzi nokusebenza kwabo.
Echaza wathi, “Sivuselele ukwazisa indlela yokuziphatha kwabasebenzi be-Eskom njengokuphepha nobuqotho okuyizinto ebesezinganakiwe. Siyazama futhi ukuthi singabi nezimfihlo nokuthi sisebenze ngokushesha. Ukukhuthaza izisebenzi ezenza kahle, sigade ukubona abenza kahle hhayi abangenzi kahle kuphela; ukwazisa abasebenza ezingeni eliphezulu futhi sesiqale uhlelo lwebhonasi yokukhiqiza ukuhlomulisa abasebenzi, hhayi abaphathi kuphela. Kubaphathi abakhulu, sesibheka amazinga okusebenza komuntu ngamunye. Sikubona kuyindlela engcono futhi ngeke kwandise izindleko ngoba silindele ukuthi imali yokuklomelisa abasebenza ezingeni eliphezulu izophuma kule ebikhokhelwa abangasebenzi kahle.”
Lezi zinyathelo zikhuthaza ukwakha ubudlelwane obuhle phakathi kwabaphathi abakhulu nezisebenzi ezingaphezulu kuka-44 000 e-Eskom. Le nkampani ibishintshashintsha abaphathi kulesi sikhathi esedlule okuphazamise ubudlelwane.
Uhulumeni ukhiphe i-Integrated Resource Plan ewuhlelo lokuguqula ukuphehlwa kukagesi kule minyaka engu-10 ezayo. Ukuphehlwa kukagesi ophakathi kuka-8 000MW no-10 000MW ngamalahle kuzoguqulwa. Kubalulekile ukuthi abaphathi be-Eskom nabasebenzi nabo baqale ekhasini elisha kulo msebenzi wokubambisana. Lezi zingxoxo zamaholo zingaba yisigaba sokuqala kuleli khasi elisha. Ayikho indawo yokukhuluma ezepolitiki kulolu hlelo lokuphendula i-Eskom; kufuneka wonke umuntu abhekane namaqiniso esimo.
I-Eskom ayisakwazi ukuqhubeka ngaphandle kokuphendulwa futhi ukuze i-Eskom ibe namandla okuzimela, akumele igqilazwe ukukhushulwa kwamaholo. Izinyunyana ziqinisile uma zibeka izinsolo kubaphathi baphambilini be-Eskom ukuthi yibona abayimbangela yobunzima obukhona manje e-Eskom kodwa lokhu akusizi ukuxazulula izinkinga i-Eskom ebhekene nazo. Ukuphendula i-Eskom yikona okusemqoka futhi sithemba ukuthi izingxoxo zamaholo ngeke zikucekele phansi lokho.
UBusi Mavuso uyisikhulu esiphezulu seBusiness Leadership SA